AQSh pochta xizmati mamlakatda saylovlar kunigacha 150 mingdan ortiq byulletenlarni ko‘rib chiqishga ulgurmay qoldi, deb yozadi “Kommersant”. Ularning 12 mingdan ziyodi hali AQSh prezidenti saylovlari g‘olibi aniqlanmagan shtatlar hissasiga to‘g‘ri keladi.
Ba’zi shtatlar, xususan, Nevada, Shimoliy Karolina va Pensilvaniya qonunlari 3-noyabrdan kamida bir hafta avval yuborilgan, ammo bu sanadan keyin yetib kelgan byulletenlarni ko‘rib chiqish imkonini beradi. Ammo Arizona va Jorjiyada 3-noyabrdan keyin kelgan byulletenlar ovozlarni sanashda hisobga olinmaydi. AQSh pochta xizmati 5-noyabr kuni sudga yo‘llagan arizasida 4-noyabr kuni bir kun avvalgidan ko‘proq byulletenlar ko‘rib chiqilganini aytgan.
Eslatib o‘tamiz, 3-noyabr kuni AQSh prezidenti saylovlari bo‘lib o‘tdi. Bu yil rekord sonli amerikaliklar pochta orqali ovoz berdi, shu sababli ko‘plab shtatlarda ovozlarni hisoblash jarayoni uzoqroq davom etmoqda.
Tramp saylov uchastkalari yopilib bo‘lganidan keyin kelgan byulletenlar (pochta orqali) hisobga olinmasligini talab qilmoqda. Ayni paytda uning raqibi, AQSh sobiq vitse-prezidenti Jo Bayden “har bitta ovoz hisobga olinishi shart”ligini ta’kidlamoqda.
AQShning ikkita shtatidagi sudlar amaldagi AQSh prezidenti Donald Trampning davlat rahbari saylovlaridagi ovozlarni hisoblash yuzasidan bergan da’volarini rad etdi.
Avvalroq esa Yevropada xavfsizlik va hamkorlik tashkiloti Amerika prezidenti saylovlari chog‘ida qoidabuzarliklar aniqlanmaganini ma’lum qilgandi. Tashkilot “amaldagi AQSh prezidenti Donald Trampning Amerika prezidenti saylovlari chog‘ida qoidabuzarliklar yuz bergani haqidagi gaplari asossiz hamda aholining demokratik institutlarga nisbatan ishonchini poymol qiladi”, — deya bayonot bergan edi.
Demokratlar partiyasidan AQSh prezidentligiga nomzod Jo Bayden esa ovoz berish natijalarini xotirjam kutishga chaqirdi.
Izoh (0)