AQShning yirik telekanallari Tramp saylovlardagi firibgarliklar haqida gapirayotganida uning nutqini uzib qo‘ydi (video)

AQShdagi ba’zi yirik telekanallar AQSh prezidenti Donald Tramp bo‘lib o‘tgan prezident saylovlari haqida dalil-isbotsiz gaplar ayta boshlaganidan keyin uning Oq uydan turib so‘zlayotgan nutqi translyatsiyasini uzib qo‘ydi, deb yozadi Meduza. Trampning nutqini MSNBC, ABC, CBS, CNBC, MBC telekanallari hamda USA Today nashri to‘xtatib qo‘ydi.

Respublikachilar partiyasidan yangi muddat uchun da’vogarlik qilayotgan Donald Tramp o‘z nutqida Demokratlar partiyasi vakillarini firibgarlikda va saylovlarni o‘g‘irlashga urinishda aybladi. Shuningdek, u faqat “qonuniy ovozlar”ni hisobga olsa, saylovlarda o‘zi g‘olib bo‘layotganini aytdi, aslida esa bir nechta asosiy shtatlarda ovozlarni sanash hali davom etmoqda.

Trampni nutqining yarmida uzib qo‘ygan MSNBC boshlovchisi Brayan Uilyams hammadan ko‘ra tezkor harakat qildi. U efirda: “Biz yana noodatiy vaziyatda qoldik: biz nafaqat AQSh prezidenti nutqini uzib qo‘yyapmiz, balki uni tuzatyapmiz ham”, — dedi.

MSNBC immediately cuts off Trump when he moves to undermine the integrity of US election system.

"Here we are again in the unusual position of not only interrupting the President of the United States but correcting the President of the United States..." pic.twitter.com/IwVshBmosK

— Oliver Darcy (@oliverdarcy) November 5, 2020

CNBC telekanalida boshlovchi Shepard Smit Trampning nutqini kesib qo‘yar ekan, “Qo‘shma Shtatlar prezidenti aytayotgan gaplar ahamiyatli darajada, mutlaqo noto‘g‘ri”ligini ta’kidladi.

President Trump just spoke at the White House, as key states continue to count votes.
Shep has the facts: “What the President of the United States is saying, in large part, is absolutely untrue.” #Election2020 https://t.co/E6DBt6OodD pic.twitter.com/HVa87qUCzB

— Last Call (@LastCallCNBC) November 6, 2020

CNN va Fox News telekanallari Trampning nutqini to‘liq ko‘rsatdi, ammo CNN jurnalisti Deniyel Deyl bu nutqni 2016-yildan buyon “eng nohaqqoniysi” deb atadi.

Twitter ham Donald Tramp nutqining translyatsiyasini to‘xtatib qo‘ydi va o‘z dasturida to‘g‘ridan to‘g‘ri efir haqidagi belgichani olib tashladi.

AQSh prezidenti saylovidan keyin Twitter Trampning 20 dan ortiq tvitining sakkiztasini yanglishtiruvchi xabarlar deb belgilab qo‘ydi, Facebook va TikTok esa saylovlar “o‘g‘irlangani” haqida noto‘g‘ri ma’lumotlar tarqatuvchi xeshteglarni blokladi.

Eslatib o‘tamiz, 3-noyabr kuni AQSh prezidenti saylovlari bo‘lib o‘tdi. Bu yil rekord sonli amerikaliklar pochta orqali ovoz berdi, shu sababli ko‘plab shtatlarda ovozlarni hisoblash jarayoni uzoqroq davom etmoqda.

Tramp saylov uchastkalari yopilib bo‘lganidan keyin kelgan byulletenlar (pochta orqali) hisobga olinmasligini talab qilmoqda. Ayni paytda uning raqibi, AQSh sobiq vitse-prezidenti Jo Bayden “har bitta ovoz hisobga olinishi shart”ligini ta’kidlamoqda.

Avvalroq esa Yevropada xavfsizlik va hamkorlik tashkiloti Amerika prezidenti saylovlari chog‘ida qoidabuzarliklar aniqlanmaganini ma’lum qilgandi. Tashkilot “amaldagi AQSh prezidenti Donald Trampning Amerika prezidenti saylovlari chog‘ida qoidabuzarliklar yuz bergani haqidagi gaplari asossiz hamda aholining demokratik institutlarga nisbatan ishonchini poymol qiladi”, — deya bayonot bergan edi.