Maxsus prokuror idorasi Donald Trampning shtabi saylovoldi kampaniya chog‘ida Oq uydan o‘z manfaatlari yo‘lida foydalangani holati yuzasidan tekshiruv boshladi. Bu haqda demokrat kongressmen Bill Paskrell o‘z Twitter’ida ma’lum qildi, deb yozadi “RBK”.
Paskrellning so‘zlariga ko‘ra, avvalroq u maxsus prokuror idorasiga murojaat qilib, Tramp ma’muriyati tomonidan Xetch qonuni buzilishi holati bo‘yicha tekshiruv o‘tkazishni talab qilgan. U yerda unga tekshiruv boshlanganini ma’lum qilishgan.
“Maxsus prokuror idorasi bugun menga Tramp kampaniyasi Xetch qonunini buzgan holda Oq uydan saylov kuni shtab sifatida hamda ziyofatlar o‘tkazish uchun foydalangani yuzasidan tekshiruv o‘tkazishlarini ma’lum qildi”, — deb yozdi Paskrell.
Xetch qonuni 1939-yilda qabul qilingan. U prezident va vitse-prezidentdan boshqa davlat xizmatchilariga saylovlarda nomzodlarni qo‘llab-quvvatlab fikr bildirishni taqiqlaydi. Agar federal organ xodimi Xetch qonunini buzsa, unga hayfsan e’lon qilinadi yoki besh yilgacha muddatda davlat muassasalarida ishlash huquqidan mahrum qilingan holda ishdan bo‘shatiladi.
Demokratlar avval ham Tramp ma’muriyati a’zolari Xetch qonunini buzgani haqida bir necha marta ma’lum qilgan. Sentabrda ular Respublikachilar partiyasining saylovoldi syezdi so‘nggi kunida prezidentning Oq uydan turib onlayn formatda nutq so‘zlash qarorini tanqid ostiga olgan edi.
O‘shanda nazorat organi qonun buzilish holatlarini aniqlamagan edi. Oq uy vakili Jadd Dir esa syezd doirasidagi barcha tadbirlar Tramp kampaniyasi va Respublikachilar partiyasi Milliy qo‘mitasi vakillari tomonidan rejalashtirilgani va o‘tkazilganini ta’kidlagan edi.
Eslatib o‘tamiz, 3-noyabr kuni AQSh prezidenti saylovlari bo‘lib o‘tdi. Bu yil rekord sonli amerikaliklar pochta orqali ovoz berdi, shu sababli ko‘plab shtatlarda ovozlarni hisoblash jarayoni uzoqroq davom etmoqda.
Tramp saylov uchastkalari yopilib bo‘lganidan keyin kelgan byulletenlar (pochta orqali) hisobga olinmasligini talab qilmoqda. Ayni paytda uning raqibi, AQSh sobiq vitse-prezidenti Jo Bayden “har bitta ovoz hisobga olinishi shart”ligini ta’kidlamoqda.
AQShning ikkita shtatidagi sudlar amaldagi AQSh prezidenti Donald Trampning davlat rahbari saylovlaridagi ovozlarni hisoblash yuzasidan bergan da’volarini rad etdi.
Izoh (0)