АҚШда ўтган бир сутка ичида коронавирус билан касалланганлар сони бўйича навбатдаги рекорд кўрсаткич қайд этилди, деб хабар беради The Hill.
Ўтган бир сутка давомида мамлакатда яна 118 минг кишида COVID-19 тасдиқланган ва 1187 киши вирус қурбонига айланган. Касалланиш бўйича юқори кўрсаткичлар Колорадо, Иллинойс, Миннесота, Пенсильвания, Юта ва Висконсин штатларида қайд этилган.
Жонс Ҳопкинс маълумотларига кўра, пандемия бошланганидан буён бутун АҚШ ҳудудида коронавирусга чалинганлар сони 9,6 миллион кишидан ошган. Ҳозирга қадар 234 мингдан ортиқ бемор COVID-19 оқибатида вафот этган. АҚШ Касалликлар назорати ва профилактикаси марказининг прогнозларига кўра, ноябрь охирига бориб, коронавирус қурбонлари сони 266 минг кишига етади.
Таъкидланишича, айрим штатлар касаллар сони ортаётгани боис чекловларни жорий этмоқда. Хусусан, Техасда айрим корхона ва ташкилотларнинг фаолиятини тўхтатиш орқали икки ҳафталик карантин эълон қилинган, Массачусецда эса аҳолига кечаси 22:00 дан 05:00 га қадар кўчага чиқмаслик тавсия этилган.
Айни вақтда АҚШда 3 ноябрь куни ўтказилган президентлик сайловларидаги овозларни ҳисоблаш жараёнлари бўлиб ўтмоқда. Сайловолди кампанияси доирасида Дональд Трамп ва унинг рақиби Жо Байден бир неча бор бир-бирини коронавирусга қарши курашдаги ҳаракатлари ёки режалари бўйича айблаган эди. Трамп қаттиқ чекловларга қарши ва у карантин иқтисодиётга зарар етказади деб ҳисоблайди. Байден эса пандемия вақтида администрациянинг ҳаракатларини «деярли жиноят» деб ҳисоблаб, ниқоб режими минглаб америкаликлар ҳаётини сақлаб қолган бўлиши мумкинлигини таъкидлаган.
Эслатиб ўтамиз, 31 октябрь куни ҳам АҚШда 100 мингдан ортиқ одамда коронавирус аниқланган эди.
Изоҳ (0)