АҚШ президенти ва Республикачилар партиясидан номзод Дональд Трамп коронавирус тарқалишидан энг кўп жабр кўрган округларда кўпчилик овозни қўлга киритди, деб ёзади «Коммерсантъ» Associated Press агентлиги ўтказган тадқиқотларга таяниб.
Агентлик аҳоли бошига энг кўп COVID-19 билан янги касалланиш ҳолатлари тўғри келадиган 376 та округда тадқиқот ўтказди. Трамп уларнинг 93 фоизида ғолиб бўлган ёки етакчилик қилмоқда.
АP фақат камида 95 фоиз овозлар санаб чиқилган округларни ҳисобга олди. Округлар ҳар 100 минг аҳолига тўғри келадиган COVID-19 ҳолатлари сонига қараб олтита тоифага бўлинди.
Бундай округларнинг кўпчилиги Монтана, Шимолий ва Жанубий Дакота, Небраска, Канзас, Айова ва Висконсиннинг қишлоқ жойларида жойлашган. Агентликнинг қайд этишича, у ерлардаги аҳоли ижтимоий масофаланиш ва ниқоб тақиш қоидаларига паст даражада риоя қилади.
АҚШда 9,6 миллиондан ортиқ киши коронавирусга чалинган, уларнинг 234 мингдан зиёди вафот этган. Аввалроқ АҚШда бир кунда аниқланган касалланиш ҳолатлари сони (102,5 минг) бўйича рекорд ўрнатилган эди.
Коронавирус тарқалиши туфайли бир қатор америкалик сайловчилар АҚШ президенти сайловида почта орқали овоз берди. Трамп почта орқали овоз бериш одамларни коррупцияга етаклашини айтмоқда. Аввалроқ ЕХҲТнинг АҚШдаги миссияси почта орқали юборилган бюллетенларни кўриб чиқиш чоғида қонун бузилишлари аниқланмаганини айтганди.
Трамп сайлов участкалари ёпилиб бўлганидан кейин келган бюллетенлар (почта орқали) ҳисобга олинмаслигини талаб қилмоқда. Айни пайтда унинг рақиби, АҚШ собиқ вице-президенти Жо Байден «ҳар битта овоз ҳисобга олиниши шарт»лигини таъкидламоқда.
АҚШнинг иккита штатидаги судлар амалдаги АҚШ президенти Дональд Трампнинг давлат раҳбари сайловларидаги овозларни ҳисоблаш юзасидан берган даъволарини рад этди.
Аввалроқ эса Европада хавфсизлик ва ҳамкорлик ташкилоти Америка президенти сайловлари чоғида қоидабузарликлар аниқланмаганини маълум қилганди. Ташкилот «амалдаги АҚШ президенти Дональд Трампнинг Америка президенти сайловлари чоғида қоидабузарликлар юз бергани ҳақидаги гаплари асоссиз ҳамда аҳолининг демократик институтларга нисбатан ишончини поймол қилади», — дея баёнот берган эди.
Демократлар партиясидан АҚШ президентлигига номзод Жо Байден эса овоз бериш натижаларини хотиржам кутишга чақирди.
Изоҳ (0)