PhoneArena sayti yangi iPhone’lar turli quvvatlantirish bloklari yordamida qanchalik tez quvvatlanishini sinab ko‘rishga qaror qildi. Jurnalistlar test uchun beshta quvvatlantirgichni tanlagan — 5, 12, 18, 20 vattli hamda ishlab chiqaruvchining 65 vattli qurilmalarini.
Yangi iPhone 12 va 12 Pro 20 vattli maksimal quvvatlanish imkoniyatiga ega. 65 vattli quvvatga ega qurilma ham smartfonlar akkumulyatorini Apple’ning 20 vattli quvvatlantirgichi kabi “to‘ldiradi”. Shu bilan birga, 18 vattli quvvatlantirgich ham shu kabi natijani ko‘rsatgan — uchala holatda ham smartfonlar noldan 100 foizgacha 1 soat 40 daqiqada quvvatlangan.
Qolgan quvvatlantirgichlar esa ancha sekin ishlaydi. 12 vattli quvvatlantirgichga iPhone 12 smartfoni 2 soat 35 daqiqada, 5 vattli — 3 soat 19 daqiqada to‘liq quvvatlangan.
Yangi iPhone smartfonlari jamlanmasidan faqatgina Lighting-kabeli o‘rin olgani sabab bu testning ahamiyati muhim — chunki foydalanuvchilarning o‘zlari yangi quvvatlantirgich sotib olishga majbur bo‘lmoqda. Uning quvvati esa quvvatlanish tezligini belgilab beradi.
Eslatib o‘tamiz, Apple’ning 15-sentabrdagi taqdimotida Watch SE hamyonbop “aqlli” soati hamda iPad planshetlari, 13-oktabrda esa to‘rtta iPhone 12 smartfoni taqdim etilgandi. Kompaniyaning navbatdagi taqdimoti esa 10-noyabr sanasiga mo‘ljallangan.
Izoh (0)