Samsung kompaniyasi o‘zining yangi flagmani — Galaxy S21’ni quvvatlantirgich va naushniksiz taqdim etishi mumkin. Bu haqda SamMobile’ga tayanib, Hi-Tech.Mail.ru xabar berdi.
Samsung smartfonlari jamlanmasini qisqartirishni rejalashtirayotgani to‘g‘risida dastlab yozda ma’lum bo‘lgandi — insayderlar Apple’ning shu kabi rejalarini e’lon qilganidan so‘ng.
Eslatib o‘tamiz, Apple oktabr oyida yangi iPhone 12 va oldingi versiyadagi “ayfon”larning qutisidan quvvatlantirgich va naushniklar olib qo‘yilgan holda sotuvga chiqishini ma’lum qilgandi. Kompaniya o‘zining bu kabi qarorini ekologiya haqida qayg‘urish bilan izohlamoqda. Aftidan, Samsung ham shu kabi ritorikadan foydalanadi.
Mish-mishlarga ko‘ra, Samsung o‘zining yangi Galaxy S21 flagmanlarini muddatidan oldin taqdim etadi — odatda u fevral oyida o‘tkaziladigan MWC ko‘rgazmasida namoyish etilardi, biroq 2021-yilda tadbirning o‘tkazilish sanasi surilgan. Shu sababli flagmanlar dekabr yoki yanvar oyida namoyish etilishi mumkin.
Avvalroq Xiaomi iPhone 12 quvvatlantirgichsiz sotuvga chiqqani sabab Apple’ning ustidan kulgandi.
Izoh (0)