Apple to‘rtta iPhone 12 smartfoni taqdimotini o‘tkazdi. Lineykadagi barcha smartfonlar 5G aloqa tarmog‘ini qo‘llab-quvvatlaydi

Apple koronavirus sabab ko‘chirilgan yangi smartfonlar taqdimotini o‘tkazdi. iPhone 12 lineykasida joriy etilgan asosiy yangilik — 5G aloqa tarmog‘ini qo‘llab-quvvatlash imkoniyati, deb xabar beradi Hi-Tech.Mail.ru. Kompaniya butun dunyo bo‘ylab yangi avlod mobil aloqa standarti bo‘yicha ish olib borishga harakat qilgan. Ta’kidlanishicha, bunda internet tezligi 4 Gb/soniyaga yetadi.

iPhone 12 smartfoni yangi Super HDR ekraniga ega bo‘ldi. iPhone 11’ga qaraganda ikki karra ko‘p piksellar, barcha HDR formatlarini qo‘llab-quvvatlaydi. Keramika esa ushbu ekranlarni yanada mustahkam qiladi. Yangi dizayn 11 foizga ingichkaroq, 15 foizga kichikroq va 16 foizga yengilroq bo‘ldi. Protsessor — olti yadroli A14 Bionic, hozirda “eng kuchli protsessor”.

Yetti elementdan iborat yangi kamera past yorug‘likda 27 foiz yaxshiroq ishlaydi. Orqa panelda MagSafe magnitli ulagich joylashgan. iPhone 12’ga ikkita kamera o‘rnatilgan — 12 megapikselli asosiy va 12 megapikselli keng burchakli.

Ikkinchi smartfon — bu iPhone 12 mini bo‘lib, u so‘nggi to‘rt yilda ishlab chiqarilgan eng kichkina “ayfon” hisoblanadi. Qurilmaga kichik hoshiyalarga ega 5,4 dyuymli OLED-displey o‘rnatilgan, shu sababli uning korpusi 4,7 dyuymli ekranga ega iPhone SE (2020)’nikidan ham kichkina.

iPhone 12 Pro

iPhone 12 Pro uchta kamera va Lidar sensoriga ega bo‘ldi. Ushbu qurilma tarixdagi eng katta iPhone deb topildi. Super Retina HDR displeyning kattaligi 6,7 dyuym. Barcha kameralar fotosuratlarni sifatini oshiradigan Deep Fusion texnologiyasini qo‘llab-quvvatlaydi.

Asosiy kameraning sensori past yorug‘liklarda iPhone 11 Pro Max smartfoniga qaraganda 87 foiz yaxshiroq tasvirga oladi. Professional fotosuratlar uchun mo‘ljallangan Apple ProRAW funksiyasi 2020-yilda paydo bo‘ladi. Bundan tashqari HDR va Dolby Vision HDR formatida 10-bitlik videolar tasvirga olish mumkin.