Sizning uyda ham borligi aniq: Semirishga sabab bo‘ladigan mahsulot va buyumlar

Vazn to‘plash nafaqat iste’mol mahsulotlari, turmush tarzi, balki foydalanadigan buyum va mahsulotlar bilan ham bog‘liq bo‘lishi mumkinligi tadqiqotlar davomida aniqlangan. Ular tarkibidagi ba’zi moddalar organizmdagi moddalar almashinuvi hamda gormonal balansga ta’sir qiladi.

Xushbo‘y iforli purkagich va vositalar

Tarkibida ftalatlar — xushbo‘y ifor uchun javob beradigan kimyoviy modda mavjud bo‘lgan mahsulotlarni ishlatmagan yaxshi. O‘tkazilgan tadqiqotlarda, ftalatlarning organizmda to‘planib metabolizmga ta’sir qilishi aniqlangan. Shu sabab ham kosmetik vositalar, shampun, tozalashda ishlatiladigan vositalar yorlig‘ini yaxshilab ko‘zdan kechiring. Agar tarkibida ftalatlar borligini bilib qolsangiz, yaxshisi undan foydalanmang.

Konservalangan mahsulotlar

Konservalangan mahsulotlarga ba’zida kimyoviy modda bisfenol A qo‘shiladi. U aksari hollarda zararsiz, ammo kislotasi baland mahsulotlar bilan qo‘shilganda (masalan konservalangan pomidor) salomatlik uchun xavfli bo‘lishi mumkin. Mahsulot xarididan avval tarkibi bilan tanishib chiqing.

Plastik idish

Plastik tarkibida ham ftalat bo‘ladi va unga taom solib mikroto‘lqinli pechda qizdirilganda mazkur modda taomga o‘tadi. Shu sabab ham plastik idishdan isitishda foydalanmaslik va unda issiq taom yemaslik tavsiya qilinadi. Tadqiqotlarda plastik idishda taom isitib yeydiganlar boshqalarga nisbatan uch baravar ko‘p vazn to‘plashi aniqlangan.