Ozarbayjon harbiylari Ozarbayjon va tan olinmagan Tog‘li Qorabog‘ o‘rtasidagi to‘qnashuv chizig‘ini yorib o‘tdi va uni yo‘q qildi. Bu haqda Ozarbayjon prezidenti Ilhom Aliyev mamlakat aholisiga qilgan telemurojaatida ma’lum qildi, deb yozmoqda Meduza.
“Men jang maydonidagi urushgacha bo‘lgan vaziyatni o‘zgartirdim. To‘qnashuv chizig‘i, u endi yo‘q. Biz uni yorib o‘tdik va yo‘q qildik. Armaniston qurolli kuchlari 30 yil davomida to‘qnashuv chizig‘ini beton konstruksiyalar yordamida mustahkamladi. Bu konstruksiyalar ham buzib tashlandi. Hech kim Ozarbayjon askariga qarshi tura olmaydi”, — deya ma’lum qilgan Ilhom Aliyev.
Ozarbayjon prezidentining bildirishicha, Ozarbayjon va Tog‘li Qorabog‘ o‘rtasida yangi to‘qnashuv chizig‘i bo‘lmaydi.
Uning qo‘shimcha qilishicha, ozarbayjonlik harbiylar Qorabog‘dagi yana to‘qqizta aholi punktini egallagan: Chayli, Yuxari Guzlak, Gerazilli, Gishlag, Garadjali, Efendiler, Suleymanli, Sur va Gadrut qishloqlari. Avvalroq Ozarbayjon Madagiz qishlog‘i ham egallanganini ma’lum qilgan.
Armaniston Mudofaa vazirligi vakili Artsrun Ovannisyan Gadrut qishlog‘i egallangani haqidagi ma’lumotni rad etgan. “Men hozir Gadrutdaman va nima uchundir faqat armanlarni ko‘ryapman”, — deb yozgan u Facebook’da.
Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Bu mintaqadagi so‘nggi o‘n yillikda kuzatilgan eng jiddiy to‘qnashuv bo‘lmoqda. Rossiya bir necha marta janglarni to‘xtatishga chaqirdi. 9-oktabr kuni Vladimir Putinning taklifiga binoan Armaniston va Ozarbayjon tashqi ishlar vazirlari muzokara o‘tkazish uchun Moskvaga tashrif buyurdi.
Izoh (0)