Озарбайжон ҳарбийлари Озарбайжон ва тан олинмаган Тоғли Қорабоғ ўртасидаги тўқнашув чизиғини ёриб ўтди ва уни йўқ қилди. Бу ҳақда Озарбайжон президенти Илҳом Алиев мамлакат аҳолисига қилган телемурожаатида маълум қилди, деб ёзмоқда Meduza.
«Мен жанг майдонидаги урушгача бўлган вазиятни ўзгартирдим. Тўқнашув чизиғи, у энди йўқ. Биз уни ёриб ўтдик ва йўқ қилдик. Арманистон қуролли кучлари 30 йил давомида тўқнашув чизиғини бетон конструкциялар ёрдамида мустаҳкамлади. Бу конструкциялар ҳам бузиб ташланди. Ҳеч ким Озарбайжон аскарига қарши тура олмайди», — дея маълум қилган Илҳом Алиев.
Озарбайжон президентининг билдиришича, Озарбайжон ва Тоғли Қорабоғ ўртасида янги тўқнашув чизиғи бўлмайди.
Унинг қўшимча қилишича, озарбайжонлик ҳарбийлар Қорабоғдаги яна тўққизта аҳоли пунктини эгаллаган: Чайли, Юхари Гузлак, Геразилли, Гишлаг, Гараджали, Эфендилер, Сулейманли, Сур ва Гадрут қишлоқлари. Аввалроқ Озарбайжон Мадагиз қишлоғи ҳам эгалланганини маълум қилган.
Арманистон Мудофаа вазирлиги вакили Арцрун Ованнисян Гадрут қишлоғи эгаллангани ҳақидаги маълумотни рад этган. «Мен ҳозир Гадрутдаман ва нима учундир фақат арманларни кўряпман», — деб ёзган у Facebook’да.
Тоғли Қорабоғда кенг қамровли жанговар ҳаракатлар 27 сентябрдан буён давом этмоқда. Бу минтақадаги сўнгги ўн йилликда кузатилган энг жиддий тўқнашув бўлмоқда. Россия бир неча марта жангларни тўхтатишга чақирди. 9 октябрь куни Владимир Путиннинг таклифига биноан Арманистон ва Озарбайжон ташқи ишлар вазирлари музокара ўтказиш учун Москвага ташриф буюрди.
Изоҳ (0)