O‘zbekiston Prezidenti Shavkat Mirziyoyev 8-oktabr kuni Turkmaniston prezidenti Gurbanguli Berdimuhamedov bilan telefon orqali muloqot qildi. Bu haqda Prezident matbuot xizmati xabar berdi.
Qayd etilishicha, davlat rahbarlari ikki tomonlama munosabatlar kun tartibidagi dolzarb masalalarni batafsil ko‘rib chiqdi. Xalqaro siyosat va mintaqaviy hamkorlik yuzasidan fikr almashildi.
O‘zbekiston va Turkmaniston o‘rtasidagi ko‘p asrlik do‘stlik va qardoshlik rishtalari, yaxshi qo‘shnichilik va strategik sheriklik munosabatlarini yanada mustahkamlashga qaratilgan faol muloqotni davom ettirish muhimligi qayd etildi.
Koronavirusning global miqyosda tarqalishi oqibatlarini samarali yengib o‘tish maqsadida amaliy hamkorlik bo‘yicha, eng avvalo, savdo, sanoat kooperatsiyasi, energetika, tranzit, qishloq xo‘jaligi va boshqa muhim tarmoqlardagi loyihalarni ilgari surish zarurligiga alohida e’tibor qaratildi.
Shu ma’noda ikki mamlakat tashqi siyosat idoralari rahbarlari tomonidan o‘tgan oyda o‘tkazilgan siyosiy maslahatlashuvlarning samarali natijalari ijobiy baholandi.
Suhbat chog‘ida O‘zbekiston va Turkmaniston prezidentlari 2019-yil noyabr oyida Toshkent shahrida o‘tgan Markaziy Osiyo davlatlari rahbarlarining navbatdagi Maslahat uchrashuvida qabul qilingan qarorlar va erishilgan kelishuvlar ijrosining borishini muhokama qildi.
Tizimli va barqaror tus olayotgan ushbu muhim format doirasida sermahsul muloqot olib borilayotgani mamnuniyat bilan ta’kidlandi.
Ko‘p tomonlama hamkorlikning ustuvor yo‘nalishlari sifatida xavfsizlik, iqtisodiyot, innovatsiyalar, transport, fan, ta’lim va madaniyat sohalari ko‘rsatib o‘tildi.
“Davlat rahbarlari Qirg‘izistondagi voqealar rivojiga alohida to‘xtaldi. Ushbu mamlakatdagi vaziyat Qirg‘iziston konstitutsiyasiga muvofiq holda tez fursatda barqarorlashishi zarurligi qayd etildi”, — deyiladi xabarda.
Bo‘lajak oliy darajadagi tadbirlar rejasi ham ko‘rib chiqildi.
Avvalroq Shavkat Mirziyoyev Qozog‘iston, Rossiya va Tojikiston prezidentlari bilan Qirg‘izistondagi vaziyatni muhokama qilgandi.
Eslatib o‘tamiz, 5-oktabr kuni Bishkekda hukumatni qo‘llab-quvvatlovchi ikki partiya g‘olib chiqqach parlament saylovlari natijalariga qarshi namoyishlar boshlandi. Tinch boshlangan aksiyalar kechga borib, huquq-tartibot organlari bilan to‘qnashuvlarga aylanib ketdi. Bir necha yuz kishi yaralandi, bir kishi vafot etdi.
6-oktabr tongida namoyishchilar Qirg‘iziston parlamenti va prezident ma’muriyati joylashgan binoni egalladi. Shundan so‘ng namoyishchilar Milliy xavfsizlik davlat qo‘mitasi binosiga qarab yo‘l oldi va maxsus xizmat xodimlari bilan muzokaralardan so‘ng ular sobiq prezident Almazbek Atambayevni o‘tgan yildan buyon hibsda saqlanayotgan MXDQ tergov izolyatoridan ozod qildi. Koloniyadan, shuningdek, Atambayev davrida hukumatni boshqargan sobiq bosh vazir Sapar Isakov ham ozod etildi.
Shu kuni Markaziy saylov komissiyasi parlament saylovlari natijalarini haqiqiy emas deb topdi, parlament rahbari va bosh vazir Kubatbek Bo‘ronov iste’foga chiqdi.
Norozilik namoyishlari fonida Bishkek shahriga namoyishchilar tomonidan yangi mer tayinlandi. Ammo shaharning rasmiy rahbari Aziz Surakmatov iste’fo haqida ariza yozganicha yo‘q. Qirg‘iziston rezidenti So‘ronbay Jeenbekov sodir bo‘lgan voqealarni hukumatni noqonuniy egallashga urinish deb atadi.
Izoh (0)