Ijtimoiy tarmoqlarda Toshkent shahar, Mirzo Ulug‘bek tumani, “Oqqo‘rg‘on” mahallasida yashovchi erkak turmush o‘rtog‘ining ustidan kulib, unga tan jarohati yetkazgani haqida ma’lumot hamda uni bolasining axlatini yeyishga majbur qilgani aks etgan video tarqaldi. Videoda aks etgan holat bo‘yicha Toshkent shahar IIBB ma’lumot berdi.
Ma’lum qilinishicha, mazkur video 1-oktabrdan 2-oktabrga o‘tar kechasi olingan. Shu tunda 102 raqamiga ayolni 46 yoshli eri Rustam I. kaltaklagani va tahqirlagani haqida xabar kelib tushgan. Ayolga yetkazilgan tan jarohatlarining og‘irligini aniqlash uchun sud-tibbiy ekspertizasi tayinlangan.
Mazkur holat bo‘yicha Mirzo Ulug‘bek tumani IIO FMB tomonidan Jinoyat kodeksining 110-moddasi 1-qismi (muttasil ravishda do‘pposlash yoki boshqacha harakatlar bilan qiynash) bilan jinoyat ishi qo‘zg‘atilgan. Rustam I. qo‘lga olingan. Tergov harakatlari davom etmoqda.
Shuningdek, 7-oktabr kuni ayolga himoya orderi berilgan. Ayni paytda ayol va uning voyaga yetmagan bolalari Og‘ir ahvolga tushib qolgan ayollarni reabilitatsiya qilish va moslashtirish markaziga vaqtincha joylashtirilgan.
Ma’lumot uchun, Jinoyat kodeksining 110-moddasi 1-qismida nazarda tutilgan jinoyatni sodir etganlik uchun bazaviy hisoblash miqdorining 50 baravaridan 100 baravarigacha miqdorda jarima yoki 360 soatgacha majburiy jamoat ishlari yoki ikki yilgacha axloq tuzatish ishlari yoxud bir yildan uch yilgacha ozodlikni cheklash yoki uch yilgacha ozodlikdan mahrum qilish bilan jazo tayinlanishi mumkin.
Eslatib o‘tamiz, avgust oyida ijtimoiy tarmoqlarda Samarqand shahrida eri tomonidan ayovsiz kaltaklanayotgani aks etgan ayol videosi tarqalib ketgan edi. Ma’lum bo‘lishicha, er ayolni muntazam xo‘rlagan va majburlab pampers yedirgan. Erkak turmush o‘rtog‘ini urgani tasvirlangan video internetda tarqalgach uyidan qochib ketgan. 23-avgust kuni erkak Toshkentda qo‘lga olinib, Samarqandga olib ketilgan. Keyinroq Senat mazkur ayol bilan bog‘liq vaziyatni o‘z nazoratiga olgandi.
Izoh (0)