Ijtimoiy tarmoqlarda 2020-yilning 7-oktabr kuni bo‘yni va qo‘llari arqon bilan bog‘langan hamda unga tan jarohati yetkazish alomatlari mavjud ko‘rinishda traktor tirkamasida majburiy ravishda olib ketilayotgan fuqaro aks etgan video tarqaldi. Tergov departamentining ma’lum qilishicha, holat yuzasidan Navoiy viloyati IIB xodimlari tomonidan olib borilgan tergovga qadar tekshiruv harakatlari davrida quyidagilar aniqlangan.
Qayd etilishicha, 2020-yilning 3-oktabr kuni soat 10:30 da Navoiy viloyati Qiziltepa tumani “Yangihayot” MFY hududida joylashgan fermer xo‘jaligi yer maydonida ushbu fermer xo‘jalik ishchisi bo‘lgan 32 yoshli S.Sh. spirtli ichimlik iste’mol qilib mast holda fermer xo‘jaligi rahbari 26 yoshli J.N.ni sha’ni va qadr-qimmatini kamsituvchi har xil qo‘pol so‘zlar bilan haqoratlagan.
Fermer xo‘jaligi rahbari J.N. ishchisi S.Sh.ni yuzi va tanasining turli joylariga urib, tepgan holda jarohat yetkazib, bo‘ynidan arqon bilan bog‘lagan. So‘ngra qo‘shni fermer xo‘jaligi traktorchisi fuqaro 28 yoshli S.N. bilan birgalikda uning traktorida fuqaro S.Sh.ni fermer xo‘jaligining dala shiyponiga olib borib, qiynoqqa solib daraxtga bog‘lab ketganliklari aniqlangan.
Shu kuni bo‘lgan holatni J.N. o‘zining qo‘l telefoniga videoga olib, tanishi T.R.ga Telegram messenjeri orqali yuborgan. T.R. esa videoni Qiziltepa tumanidagi tanishlariga tarqatganligi aniqlangan.
Bundan tashqari, 2020-yil 4-oktabr kuni fuqaro S.Sh. fermer xo‘jaligi rahbari J.N.ning Qiziltepa tumani “Azizobod” MFYdagi yashash xonadoniga bir kun oldingi holatga oydinlik kiritish maqsadida borganida fermer xo‘jaligi rahbarining otasi 52 yoshli N.V. o‘zaro tortishuvdan so‘ng S.Sh.ni yashash xonadoniga olib kirib, tanasining turli joylariga urib, tan jarohati yetkazganligi aniqlangan.Mazkur holat yuzasidan Qiziltepa tuman IIB huzuridagi tergov bo‘linmasi tomonidan Jinoyat kodeksining 109-moddasi 2-qismi (qasddan badanga yengil shikast yetkazish) va 138-moddasi 1-qismi (zo‘rlik ishlatib g‘ayriqonuniy ravishda ozodlikdan mahrum qilish) bilan jinoyat ishi qo‘zg‘atilgan. Hozirda holat yuzasidan surishtiruv ishlari davom etmoqda.
Yuqoridagi kabi harakatlar Ma’muriy javobgarlik to‘g‘risidagi kodeksining 189-1-moddasi va Jinoyat kodeksining 130-1-moddalarida ko‘rsatilgan “Zo‘ravonlikni yoki shafqatsizlikni targ‘ib qiluvchi mahsulotni tayyorlash, olib kirish, tarqatish, reklama qilish, namoyish etish” kabi ma’muriy va jinoiy javobgarlikni keltirib chiqarishi departament tomonidan eslatib o‘tilgan.
Avvalroq Samarqandda oila a’zolari tomonidan kaltaklanib, uyidan chiqarib yuborilgan ayol voqeasi bo‘yicha rasmiy munosabat bildirilgandi.
Izoh (0)