AQShda afroamerikalik Jorj Floydning o‘limida ayblangan sobiq politsiyachi Derek Shovin bir million dollar garov puli evaziga qamoqdan chiqdi, deb yozadi Meduza.
Shovin to‘lov uchun pulni qayerdan olgani noma’lum. Endi politsiyachi sud majlisiga 2021-yil 8-mart kuni kelishi kerak.
Sobiq politsiyachi may oxiridan buyon hibsda saqlanayotgan edi. Unga ikkinchi darajali qotillik ayblovi e’lon qilingan. Aybdor deb tan olingan taqdirda sobiq politsiyachi 40 yilgacha qamalishi mumkin.
Floydning o‘limi haqida ish bo‘yicha Shovinning sobiq hamkasblari Tomas Leyn, Aleksander Kueng va Tu Tao ham ayblanmoqda. Ularning barchasi avvalroq garov puli evaziga qo‘yib yuborilgan edi.
Eslatib o‘tamiz, Minneapolis shahri politsiyachisi 25-may kuni 46 yoshli afroamerikalik Jorj Floydni qo‘lga olish chog‘ida uni tutib, yerga yotqizgan va tizzasi bilan bo‘ynini bosgan. Politsiyachi uni shu tariqa uzoq vaqt ushlab turishi Jorj Floydning o‘limiga sabab bo‘lgan. Holat aks etgan video ijtimoiy tarmoqlarda tarqalgach, AQShning turli hududlarida norozilik namoyishlari boshlangan. AQShning 25 ta shahrida ommaviy noroziliklar sabab komendantlik soati e’lon qilindi. Donald Tramp Oq uy qarshisida sodir bo‘lgan norozilik namoyishi vaqtida yerosti bunkeriga berkingani ma’lum bo‘lgandi.
Izoh (0)