Dunyoda COVID-19 bilan kasallanish holatlari soni 36 milliondan oshdi, deb xabar bermoqda “RBK” Jons Hopkins universiteti ma’lumotlariga tayanib.
Pandemiya boshidan buyon jami 36,068 million kishi koronavirusga chalingan. Ulardan 1,054 millioni vafot etgan.
Kasallanganlar soni bo‘yicha birinchi o‘rinda AQSh turibdi, u yerda 7,5 milliondan ziyod kishi infeksiyani yuqtirib olgan. Ikkinchi o‘rinda — Hindiston (6,7 million kishi), keyingi o‘rinda — Braziliya (5 million kishi), Rossiya esa to‘rtinchi o‘rinda bormoqda (1,2 million kishi).
Koronavirus tufayli vafot etganlar soni bo‘yicha ham AQSh yetakchilik qilmoqda — 211 ming kishi. Braziliyada 148,2 ming kishi, Hindistonda 104,5 ming kishi vafot etgan.
Avvalroq Jahon sog‘liqni saqlash tashkiloti COVID-19’ga chalinish holatlarining haqiqiy soni rasman qayd etilganidan ancha ko‘p bo‘lishi mumkinligini ma’lum qilgandi. Ayni paytgacha virusga Yer aholisining taxminan 10 foizi — 780 million kishi chalingan bo‘lishi mumkin.
Ma’lumot uchun, dunyoda koronavirusga chalinganlar soni 30-avgustda 25 million, 11-sentabrda 28 million, 14-sentabrda 29 million, 18-sentabrda 30 million, 21-sentabr kuni 31 million, 5-oktabr kuni 35 million kishidan oshgan edi.
Izoh (0)