АҚШда афроамерикалик Жорж Флойднинг ўлимида айбланган собиқ полициячи Дерек Шовин бир миллион доллар гаров пули эвазига қамоқдан чиқди, деб ёзади Meduza.
Шовин тўлов учун пулни қаердан олгани номаълум. Энди полициячи суд мажлисига 2021 йил 8 март куни келиши керак.
Собиқ полициячи май охиридан буён ҳибсда сақланаётган эди. Унга иккинчи даражали қотиллик айблови эълон қилинган. Айбдор деб тан олинган тақдирда собиқ полициячи 40 йилгача қамалиши мумкин.
Флойднинг ўлими ҳақида иш бўйича Шовиннинг собиқ ҳамкасблари Томас Лейн, Александер Куэнг ва Ту Тао ҳам айбланмоқда. Уларнинг барчаси аввалроқ гаров пули эвазига қўйиб юборилган эди.
Эслатиб ўтамиз, Миннеаполис шаҳри полициячиси 25 май куни 46 ёшли афроамерикалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинди. Дональд Трамп Оқ уй қаршисида содир бўлган норозилик намойиши вақтида ерости бункерига беркингани маълум бўлганди.
Изоҳ (0)