Pandemiya davrida dunyodagi milliarderlarning boyligi rekord darajada o‘sgani ma’lum bo‘ldi

Dunyodagi milliarderlarining umumiy boyligi miqdori pandemiya vaqtida 27,5 foizga o‘sib, 2020-yilning iyul oyi oxirida 10,2 trillion dollarga yetdi. Bu 2017-yilning oxirida qayd etilgan 8,9 trillion dollarni ortda qoldirgan yangi rekord, deb yozmoqda “RBK”.

Ma’lum qilinishicha, mazkur ma’lumotlar UBS va PwC kompaniyalari tomonidan amalga oshirilgan tahlillar asosida olingan.

Kompaniyalar odatda bunday tahlillar natijalarini aprel oyidagi ma’lumotlar asosida tayyorlaydi. Biroq 2020-yilda “COVID-19’ning o‘zgartiruvchi effektini” va mart oyidagi pasayishdan keyin fond bozorining tiklanishini qamrab olish uchun tahlillar muddati iyul oyining oxirigacha uzaytirilgan.

7-aprel holatiga ko‘ra, dunyoda 2058 nafar milliarder bo‘lgan. Bu 2019-yilga nisbatan 43 nafarga kam. Ularning umumiy boyligi 8 trillion dollarga baholangan. Tadqiqot yakunlanadigan sana — 31-iyulda milliarderlar soni 2189 nafarga yetgan va ularning boyligi 10,2 trillion dollarni tashkil qilgan.

Tadqiqot mualliflarining ma’lum qilishicha, aprel—iyul oylarida fond bozoridagi o‘sish sababli milliarderlarning boyligi yangi rekordni qayd etgan.

2020-yilning birinchi yarmida pandemiya dunyo iqtisodiyotining bir qismini deyarli to‘xtatdi va “fond bozorlarida bo‘ronni yuzaga keltirdi. Fevral va mart oylarida bir necha hafta ichida milliarderlarning boyligi 2019-yilga nisbatan 6,6 foizga yoki 564 milliard dollarga kamaygan. Biroq iyul oyining oxiriga kelib ularning boyligi miqdori 2019-yildagi ko‘rsatkichdan o‘tib ketdi.

So‘nggi besh yilda birinchi marta aynan 2019-yil boyliklarning kamayishi bilan esda qolgan. Biroq so‘nggi o‘n yillikda milliarderlarning soni qariyb uch martaga ko‘paygan va boylik miqdori 2,8 trillion dollardan 8 trillion dollarga oshgan, milliarderlarning soni esa 2009-yildagi 969 nafardan ikki baravar ko‘paygan.