Belarus muxolifati yetakchisi Svetlana Tixanovskaya Rossiya Ichki ishlar vazirligining qidirilayotgan shaxslar bazasiga kiritildi. Bu haqda Meduza xabar berdi.
“TASS”ning huquqni muhofaza qiluvchi idoralardagi manbasi ma’lum qilishicha, qidiruv Belarusda e’lon qilingan, biroq u Rossiyada ham amalga oshiriladi, chunki gap davlatlararo qidiruv haqida ketmoqda. Belarusda Tixanovskaya milliy xavfsizlikka qarshi qaratilgan harakatlarga chorlash moddasi bo‘yicha ayblanmoqda.
Rossiya Ichki ishlar vazirligining qidirilayotgan shaxslar bazasiga Belarus muxolifatining Nexta Telegram kanali bosh muharriri Roman Protasevich ham kiritilgan.
Belarus Markaziy saylov komissiyasi ma’lumotlariga ko‘ra, Svetlana Tixanovskaya prezidentlik saylovida 10,1 foiz ovoz to‘plagan. Saylovlarni soxtalashtirish haqidagi ma’lumotlar fonida Belarusda ommaviy norozilik namoyishlari boshlandi. Tixanovskayaning o‘zi esa mag‘lubiyatini tan olmadi va o‘zini “Belarus xalqi tomonidan saylangan yagona yetakchi” deb atadi.
Hozirgi paytda Tixanovskaya Yevropada bo‘lib turibdi. U saylovdan bir necha kun o‘tgach Belarusdan chiqib ketishga majbur bo‘lgan. Bunga mamlakat rasmiylarining undan saylov natijalarini tan olishni talab qilib o‘tkazgan bosimi va tahdidlari sabab bo‘lgan.
Belarusda milliy xavfsizlikka qarshi qaratilgan harakatlarga chorlash moddasi bilan Tixanovskayaning safdoshlari — muxolifat muvofiqlashtiruvchi kengashi a’zolari Maksim Znak va Mariya Kolesnikova ham ayblanmoqda.
Izoh (0)