AQSh prezidenti Donald Trampni COVID-19’dan davolash narxi 100 ming dollardan oshishi mumkin, deb yozadi “RBK” The New York Times’ga tayanib.
Ushbu summaga Uolter Rid nomidagi milliy harbiy tibbiyot markazidagi uch kunlik davolanish, vertolyotda ikki marta uchish, ko‘p sonli koronavirusga testlar, kislorod, steroidlar va antijismlar aralashmasini kiritish yo‘li bilan tajribali davolash kursi kiritildi. NYT’ning yozishicha, xarajatlarning katta qismini gospitalda bo‘lish emas, uning tashqarisida ko‘rsatiladigan xizmatlar, masalan, vertolyotda parvozlar va virusga test olish tashkil qiladi.
Nashrning eslatishicha, Tramp qabul qilgan “Remdesivir” preparati bilan davolash kursi xususiy sug‘urta kompaniyalari tomonidan to‘langanda 3120 dollar, Medicare va Medicaid kabi davlat dasturlari doirasida to‘langanda 2340 dollar turadi. Shuningdek, FAIR Health hisob-kitoblariga ko‘ra, 60 dan oshgan katta yoshdagi bemorning kasalxonada yotishi o‘rtacha 61 912 dollarga tushadi. Vertolyotda kasalxonaga olib kelish taxminan 38 770 dollarni tashkil qiladi.
Gazetaning aniqlik kiritishicha, prezidentni davolash xarajatlarini hukumat qoplaydi. Shu bilan birga, hatto tibbiy sug‘urtaga ega amerikaliklar ham COVID-19’dan davolanishda katta xarajatlarga duch keladi.
Eslatib o‘tamiz, Donald Tramp va uning rafiqasi Melaniyaning 2-oktabr kuni koronavirusga topshirgan testi ijobiy chiqqan. So‘ng u Uolter Rid nomidagi milliy harbiy tibbiyot markaziga yotqizilgan.
Donald Tramp o‘z tarafdorlari bilan uchrashish uchun biroz vaqtga shifoxonani tark etgani xabar berilgan edi. Shuningdek, u koronavirusga topshirgan birinchi testining javobi ijobiy chiqqanini yashirgani ma’lum bo‘lgandi.
6-oktabr kuni esa koronavirusga chalingan AQSh prezidenti Donald Trampga harbiy gospitaldan javob berilgani xabar qilindi.
Izoh (0)