Qarshi shahri bugun 27-iyul 00:01 dan boshlab yopildi. 2020-yil 15-avgustga qadar shaharda barcha avtomobillar harakati cheklandi. Bu haqda “Daryo”ga viloyat hokimligi axborot xizmati rahbari Ahror Sodiqov ma’lum qildi.
Ahror Sodiqovning ma’lumot berishicha, 2020-yil 27-iyul kuni viloyat maxsus komissiyasining navbatdagi yig‘ilishi bo‘lib o‘tgan. Yig‘ilish yakuniga ko‘ra, Qarshi shahriga barcha turdagi transport vositalarining kirishi va harakatlanishi cheklangan. Biroq zarur dori-darmonga chiqish, homiladorlarni shifokor ko‘rigidan o‘tkazish uchun shifoxonaga olib borish bundan mustasno. Shuningdek, qishloq xo‘jalik va oziq-ovqat mahsulotlarini yetkazib berish bilan shug‘ullanuvchilar, quruvchi tashkilot va tadbirkorlik subyektlariga tegishli jihoz, xomashyo materiallarini tashishga mo‘ljallangan avtomashinalar harakatiga ham to‘siq yo‘q.
Ta’kidlanishicha, mazkur muddat davomida Qarshi shahridagi barcha tashkilot va korxona mas’ullari ishchilarining onlayn ish rejimiga o‘tishi va mehnat ta’tiliga chiqishini ta’minlaydi.
Mulkchilik shaklidan qat’i nazar, korxona, tashkilot va muassasalar tuman va shaharlardan qatnab ishlovchi xodimlarini yotoq (vaxta) usuliga o‘tkazadi. Xodimlarini boshqa hududga vaqtinchalik xizmat safariga yuborishni to‘xtatadi.
Viloyat transport boshqarmasi boshlig‘i Sherzod Norboboyevning qo‘shimcha qilishicha, Qarshi va Shahrisabz shaharlari, tumanlar markazlarida xizmat ko‘rsatayotgan yo‘nalishsiz taksilar soni uch baravargacha qisqartiriladi.
Ta’kidlashicha, Qarshida kuchaytirilgan karantin davrida aholiga 111 ta tashuvchi korxona tasarrufidagi 1666 ta yo‘nalishsiz taksi xizmat ko‘rsatgan.
Sherzod Norboboyev faoliyati davom etadigan taksichilarga murojaat qilar ekan, transport vositasini belgilangan har to‘rt soatda dezinfeksiya qilishni, avtomobil salonida antiseptik vositalar bo‘lishini ta’minlashini va niqobsiz yo‘lovchilarga xizmat ko‘rsatmaslikni so‘raydi.
“Ortiqcha odam olmang. Salonni ajratib turuvchi shaffof material ozoda bo‘lishi va yaroqsiz holga kelganda yangilab turilishiga e’tibor qarating. Hozirgi qiyin vaziyatda yo‘lkirani asossiz oshirib yubormang”, — viloyat transport boshqarmasi boshlig‘i.
Boshqarma boshlig‘i viloyat aholisiga murojaat qilar ekan, yo‘lkirani asossiz oshirgan taksilarga duch kelsa, boshqarmada tashkil etilgan (0375) 227-00-72 raqamli ishonch telefoniga murojaat qilinishini so‘ragan.
Izoh (0)