Қарши шаҳри бугун 27 июль 00:01 дан бошлаб ёпилди. 2020 йил 15 августга қадар шаҳарда барча автомобиллар ҳаракати чекланди. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.
Аҳрор Содиқовнинг маълумот беришича, 2020 йил 27 июль куни вилоят махсус комиссиясининг навбатдаги йиғилиши бўлиб ўтган. Йиғилиш якунига кўра, Қарши шаҳрига барча турдаги транспорт воситаларининг кириши ва ҳаракатланиши чекланган. Бироқ зарур дори-дармонга чиқиш, ҳомиладорларни шифокор кўригидан ўтказиш учун шифохонага олиб бориш бундан мустасно. Шунингдек, қишлоқ хўжалик ва озиқ-овқат маҳсулотларини етказиб бериш билан шуғулланувчилар, қурувчи ташкилот ва тадбиркорлик субъектларига тегишли жиҳоз, хом ашё материалларини ташишга мўлжалланган автомашиналар ҳаракатига ҳам тўсиқ йўқ.
Таъкидланишича, мазкур муддат давомида Қарши шаҳридаги барча ташкилот ва корхона масъуллари ишчиларининг онлайн иш режимига ўтиши ва меҳнат таътилига чиқишини таъминлайди.
Мулкчилик шаклидан қатъи назар, корхона, ташкилот ва муассасалар туман ва шаҳарлардан қатнаб ишловчи ходимларини ётоқ (вахта) усулига ўтказади. Ходимларини бошқа ҳудудга вақтинчалик хизмат сафарига юборишни тўхтатади.
Вилоят транспорт бошқармаси бошлиғи Шерзод Норбобоевнинг қўшимча қилишича, Қарши ва Шаҳрисабз шаҳарлари, туманлар марказларида хизмат кўрсатаётган йўналишсиз таксилар сони уч бараваргача қисқартирилади.
Таъкидлашича, Қаршида кучайтирилган карантин даврида аҳолига 111 та ташувчи корхона тасарруфидаги 1666 та йўналишсиз такси хизмат кўрсатган.
Шерзод Норбобоев фаолияти давом этадиган таксичиларга мурожаат қилар экан, транспорт воситасини белгиланган ҳар тўрт соатда дезинфекция қилишни, автомобиль салонида антисептик воситалар бўлишини таъминлашини ва ниқобсиз йўловчиларга хизмат кўрсатмасликни сўрайди.
«Ортиқча одам олманг. Салонни ажратиб турувчи шаффоф материал озода бўлиши ва яроқсиз ҳолга келганда янгилаб турилишига эътибор қаратинг. Ҳозирги қийин вазиятда йўлкирани асоссиз ошириб юборманг», — вилоят транспорт бошқармаси бошлиғи.
Бошқарма бошлиғи вилоят аҳолисига мурожаат қилар экан, йўлкирани асоссиз оширган таксиларга дуч келса, бошқармада ташкил этилган (0375) 227-00-72 рақамли ишонч телефонига мурожаат қилинишини сўраган.
Изоҳ (0)