O‘zbekistonda 2020-yil 26-iyul soat 23:30 holatiga ko‘ra, yana 140 kishida koronavirus infeksiyasi aniqlandi va kasallanganlarning umumiy soni 20 531 nafarga yetdi. Bu haqda Sog‘liqni saqlash vazirligi xabar bergan.
Yangi kasallanish holatlarining
- 83 tasi Toshkent shahrida;
- 31 tasi Farg‘ona viloyatida;
- 26 tasi Samarqand viloyatida koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.
26-iyul kuni Toshkent viloyatida 67 nafar, Samarqand viloyatida 64 nafar, Toshkent shahrida 44 nafar, Surxondaryo viloyatida ham 44 nafar, Andijon viloyatida 38 nafar, Farg‘ona viloyatida 11 nafar hamda Sirdaryo viloyatida 6 nafar, jami 274 nafar bemor koronavirus infeksiyasidan tuzalgan.
Shu tariqa O‘zbekistonda COVID-19 infeksiyasidan tuzalganlar soni 11 105 nafarni (54 foiz) tashkil qilmoqda.
“9310 nafar bemorga shifokorlar tomonidan belgilangan standartlar bo‘yicha davo choralari ko‘rilmoqda”, — deyiladi SSV axborotida.
Epidemiya boshlanganidan beri mamlakatda Sog‘liqni saqlash vazirligi tomonidan 116 kishining koronavirus asoratlaridan vafot etgani xabar qilingan. “Daryo” hisobi bo‘yicha (davlat idoralari tomonidan rasman e’lon qilingan, ammo SSV statistikasiga kiritlmagan holatlar) koronavirusga chalingach vafot etganlar soni 122 nafarni tashkil etmoqda.
Izoh (0)