Sog‘liqni saqlash vazirligi Jizzax viloyatida koronavirusga chalingan 64 yoshli erkakning vafot etganini xabar qildi.
Xabarga ko‘ra, Jizzax viloyati Baxmal tumanida yashagan 64 yoshli B.Sh. ismli erkakda COVID-19 tasdiqlangach, u viloyat yuqumli kasalliklar shifoxonasiga yotqizilgan.
Shifoxonada unga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan. Kasallik o‘tkir nafas yetishmovchiligi, poliorgan yetishmovchilik asorati bilan kechgan.
Shuningdek, bemorda yurak ishemik kasalligi, zo‘riqish stenokardiyasi, gipertoniya, qandli diabet, semizlikning 3-darajasi kabi hamroh kasalliklar ham bo‘lgan.
“Bemorning ahvoli keskin og‘irlashgan va yurak-qon tomir yetishmovchiligi, saturatsiya ko‘rsatkichi pasayib borishi, nafas olishining qiyinlashuvi bo‘yicha mutaxassislar tomonidan o‘tkazilgan reanimatsion choralarga qaramay o‘tkir nafas va yurak-qon tomir yetishmovchiligidan vafot etgan”, — deyiladi Sog‘liqni saqlash vazirligining xabarida. Bemorning qaysi sanada vafot etgani rasmiy axborotda ma’lum qilinmagan.
Jizzax viloyatida COVID-19 asoratlaridan vafot etgan bemorlar soni 6 nafarga yetdi.
Hozirgacha Sog‘liqni saqlash vazirligi 115 kishining koronavirus asoratlaridan vafot etganini xabar berdi (Toshkent shahri Shayxontohur tumanida yashagan 67 yoshli T.Z. vafot etgani haqida xabar berilgan edi). “Daryo” hisobi bo‘yicha koronavirusga chalingach vafot etganlar soni 121 nafarni tashkil etmoqda.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan.
Shuningdek, 22-iyulda bosh prokurorning sobiq o‘rinbosari, hozirda Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov, Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova koronavirus asoratlaridan vafot etgani xabar qilingan. Biroq ushbu olti holat yuzasidan SSV tomonidan ayni vaqtgacha axborot berilmagan.
Izoh (0)