Adliya vazirligi Moliya vazirligining 2020-yil 5-martdagi xati bo‘yicha taqdimnoma kiritdi. Bu haqda Telegram’dagi “Bank va mijoz” kanalida xabar berildi.
Taqdimnomada aytilishicha, xatda xo‘jalik yurituvchi subyektlarning huquqlari, erkinliklari va qonuniy manfaatlariga daxl qiluvchi huquqiy normalar aniqlangan.
Xususan, ushbu xatda tijorat banklaridan o‘zlarining kredit siyosati va tegishli ichki reglamentlariga, kredit beruvchi bankning 50 foizdan ortiq ulushi bo‘lgan sug‘urta kompaniyalari tomonidan kreditlarni sug‘urtalash amaliyotini 2020-yil 1-apreldan to‘xtatishini nazarda tutadigan o‘zgartirishlar kiritishni ta’minlash so‘ralgan.
Ta’kidlanishicha, tijorat banklari kredit siyosatiga nisbatan qo‘yiladigan talablar to‘g‘risidagi nizom hamda bank va sug‘urta faoliyatini tartibga soluvchi boshqa qonun hujjatlarida kredit beruvchi bankning ulushi bo‘lgan sug‘urta kompaniyalarida kreditlarni sug‘urtalashga cheklov o‘rnatilmagan.
Shuningdek, “Banklar va bank faoliyati to‘g‘risida”gi qonunning 8-moddasiga asosan davlat organlari va ularning mansabdor shaxslariga banklar faoliyatiga aralish taqiqlanishi eslatib o‘tilgan.
Shu sababli Moliya vazirligidan ushbu xatni ijrodan chaqirib olinishi va bu haqida Adliya vazirligiga axborot berish vazifasi yuklatilgan.
Izoh (0)