Адлия вазирлиги Молия вазирлигининг 2020 йил 5 мартдаги хати бўйича тақдимнома киритди. Бу ҳақда Telegram’даги «Банк ва мижоз» каналида хабар берилди.
Тақдимномада айтилишича, хатда хўжалик юритувчи субъектларнинг ҳуқуқлари, эркинликлари ва қонуний манфаатларига дахл қилувчи ҳуқуқий нормалар аниқланган.
Хусусан, ушбу хатда тижорат банкларидан ўзларининг кредит сиёсати ва тегишли ички регламентларига, кредит берувчи банкнинг 50 фоиздан ортиқ улуши бўлган суғурта компаниялари томонидан кредитларни суғурталаш амалиётини 2020 йил 1 апрелдан тўхтатишини назарда тутадиган ўзгартиришлар киритишни таъминлаш сўралган.
Таъкидланишича, тижорат банклари кредит сиёсатига нисбатан қўйиладиган талаблар тўғрисидаги низом ҳамда банк ва суғурта фаолиятини тартибга солувчи бошқа қонун ҳужжатларида кредит берувчи банкнинг улуши бўлган суғурта компанияларида кредитларни суғурталашга чеклов ўрнатилмаган.
Шунингдек, «Банклар ва банк фаолияти тўғрисида»ги қонуннинг 8-моддасига асосан давлат органлари ва уларнинг мансабдор шахсларига банклар фаолиятига аралиш тақиқланиши эслатиб ўтилган.
Шу сабабли Молия вазирлигидан ушбу хатни ижродан чақириб олиниши ва бу ҳақида Адлия вазирлигига ахборот бериш вазифаси юклатилган.
Изоҳ (0)