Adliya vazirligi 9-mart kuni “Huquqiy tayanch” jamoat birlashmasini ro‘yxatdan o‘tkazdi. Bu haqda tashkilot yetakchilaridan biri A’zam Farmonov “Gazeta.uz”ga ma’lum qilgan.
Uning aytishicha, nodavlat notijorat tashkilot jamoat birlashmasi shaklida ro‘yxatdan o‘tkazilgan. Human Rights Watch xarqaro tashkilotining sobiq yurist-konsultanti va Markaziy Osiyo bo‘yicha vakili Stiv Sverdlovning ma’lum qilishicha, tashkilot uch urinishda rasman ro‘yxatdan o‘tishga muvaffaq bo‘lgan va 2003-yildan beri O‘zbekistonda ro‘yxatdan o‘tgan inson huquqlarini himoya qiluvchi birinchi tashkilot bo‘ldi.
Ro‘yxatga olish to‘g‘risidagi guvohnomada qayd etilganidek, tashkilotning asosiy maqsadi fuqarolik jamiyatini rivojlantirish va inson huquqlarini ta’minlashni kafolatlashda ko‘maklashishdir.
Xalq orasida “Jasliq” nomi bilan tanilgan Qoraqalpog‘istonda joylashgan jazoni ijro etish muassasasi sobiq mahkumi A’zam Farmonov 11 yillik tutqunlikdan so‘ng 2017-yili ozodlikka chiqarilgandi. Inson huquqlari jamiyatining a’zosi hisoblangan Farmonov 2006-yilda tovlamachilik kabi jinoyatlarni sodir etishda aybli topilgandi.
2018-yili ozodlikka chiqqan jurnalist Dilmurod Saidov hamda Farmonov “Adolat tiklanishi” NNT davlat ro‘yxatidan o‘tkazish uchun murojaat qilgan, ammo ularning so‘rovi 2019-martda rad qilingan. Shuningdek, huquqshunos A’zam Turg‘unov ham ozodlikka chiqqandan so‘ng o‘z faoliyatini davom ettirish uchun Adliya vazirligiga murojaat qilgan. Ammo uning urinishi hozirgacha natijasiz bo‘lmoqda.
Bundan avval Adliya vazirligi tomonidan bosh vakolatxonasi AQShda joylashgan xalqaro nodavlat notijorat tashkiloti “Mehribonlik Korpusi” (Mercy Corps)ning O‘zbekistondagi filiali davlat ro‘yxatidan o‘tkazilgani xabar qilingandi.
Izoh (0)