O‘zbekistonda ikki yilda 58 nafar oliy ta’lim xodimi o‘qishga kiritish masalasida jinoiy javobgarlikka tortildi

O‘zbekistonda so‘nggi ikki yilda o‘qishga kiritish vaji bilan 115 nafar, jumladan, 58 nafar oliy va 57 nafar o‘rta maxsus ta’lim xodimlari jinoiy javobgarlikka tortilgan. Bu haqda bosh prokuror Nig‘matilla Yo‘ldoshev Korrupsiyaga qarshi kurashish bo‘yicha Respublika Idoralararo komissiyasining kengaytirilgan yig‘ilishida aytib o‘tdi.

Masalan, Samarqand iqtisodiyot va servis instituti o‘qituvchisi K. fuqaro D.ni institutning buxgalteriya fakulteti sirtqi yo‘nalishiga o‘qishga kiritish uchun 10 ming dollar olganida ushlangan.

Qarshi davlat universitetining prorektori N. maxsus sirtqi bo‘limga kirish imtihonlaridan o‘ta olmagan O.ni o‘qishga kirishida yordam berish vaji bilan 3 ming dollar olgani uchun jinoiy javobgarlikka tortilgan.

Bosh prokuratura matbuot xizmatidan ma’lum qilishlaricha, yig‘ilishda ijodiy imtihon jarayonlari xolis va adolat bilan o‘tkazilmayotganligi ham tanqid ostiga olingan.

Xususan, Farg‘ona davlat universiteti o‘qituvchisi S., qabul komissiya a’zosi ekanligidan foydalanib, fuqaro A.ni ijodiy imtihondan yuqori ball olishida yordam berish evaziga 6 ming dollar olganida ushlangan.

So‘nggi ikki yilda 21 nafar talabaning bunday jinoyatlarga aralashib javobgarlikka tortilganligi tizimdagi korrupsiya oqibati sifatida keskin tanqidga olingan.