Bosh vazir Abdulla Aripov O‘zLiDeP Siyosiy kengashining 18-yanvar kuni bo‘lib o‘tgan majlisida O‘zbekiston hukumatining yaqin muddatga va uzoq istiqbolga mo‘ljallangan harakatlar dasturini taqdim etdi.
Unda ta’kidlanishicha, rivojlangan va zamonaviy yo‘l-transport, muhandislik-kommunikatsiya infratuzilmasini yaratish masalalari ham O‘zbekiston hukumatining muhim vazifalardan biri bo‘lib qoladi.
Bu borada, rivojlangan davlatlar tajribasini o‘rgangan holda, 2020—2030-yillarda O‘zbekiston avtoyo‘llarini rivojlantirish strategiyasi va O‘zbekistonning transport tizimini rivojlantirish strategiyasi ishlab chiqiladi.
Mazkur strategiyalar ijrosini ta’minlash natijasida 2020—2025-yillarda jami 21 167 kilometr uzunlikdagi umumiy foydalanishdagi va mintaqaviy ichki yo‘llar hamda 280 ta ko‘prik va yo‘l o‘tkazgichlar rekonstruksiya qilinadi.
“Shuningdek, 1 100 kilometr uzunlikdagi xalqaro va davlat ahamiyatidagi avtomobil yo‘llarini ta’mirlab, xalqaro tranzit hajmini uch baravarga oshirishga erishiladi”, — dedi bosh vazir Abdulla Aripov.
Qo‘shimcha qilishlaricha, 2035-yilgacha bo‘lgan davrda yillik yuk tashish hajmi 1,2 milliard tonnadan 2,5 milliard tonnaga, yo‘lovchi tashish hajmi 2019-yildagi 6 milliard yo‘lovchidan 9 milliard yo‘lovchiga yetkaziladi.
Izoh (0)