O‘zbekiston hukumati Rossiyadan mehnat muhojirlariga nisbatan amnistiya so‘radi. Bu haqda, O‘zbekiston Tashqi ishlar vazirligiga yaqin manbaga tayanib, “Kommersant” xabar bermoqda deb yozadi “Kun.uz”.
“Bir necha yuz ming O‘zbekiston fuqarolari Rossiyaga kira olmayapti, chunki ular avval migratsiya qonunchiligini buzgan. Rossiyaga keyinchalik qayta kirishga yo‘l qo‘yilmaydi deb, hududni tark etishga qo‘rqib turgan xuddi shuncha qonunbuzar bor”, — deb yozadi “Kommersant”.
Moskva Toshkentni postsovet hududidagi integratsion jarayonlarga, birinchi navbatda, Yevrosiyo iqtisodiy ittifoqiga (YeOII) jalb etishdan manfaatdor. O‘zbekiston bu ittifoqqa qo‘shilishi mumkinligi 2019-yilda ma’lum bo‘lgandi. Toshkent bu borada hali yakuniy qaror qabul qilmagan.
Rossiya tashqi ishlar vaziri Sergey Lavrovning tashrifi arafasida, O‘zbekiston Prezidenti Administratsiyasi huzuridagi Iqtisodiy tadqiqotlar va islohotlar markazi ekspertlari mamlakatning YeOIIga a’zo bo‘lishining afzalliklari va xavf-xatarlari to‘g‘risida birinchi hisobotni taqdim etdi.
Markaz hisobotlariga ko‘ra, iqtisodiy maqsadga muvofiqlik nuqtai nazaridan, YeOIIda ishtirok etish O‘zbekiston biznesi uchun foydali. “Ittifoqqa kirgan taqdirda, mahalliy ishlab chiqaruvchilar bir qator mamlakatlar bozorlariga kirish bo‘yicha teng huquqqa ega bo‘lishadi, mehnat muhojirlari uchun sharoit yaxshilanadi”, — deb fikr bildirgan ekspertlar.
Shu bilan birga, “Kommersant” manbalarining qayd etishicha, O‘zbekiston ittifoq bo‘yicha bo‘lajak sheriklarga o‘zining qator tarmoqlari uchun imtiyozli o‘tish davrlar (ba’zi hollarda o‘n yilgacha) berilishi xohlayotganini oldindan bildirgan.
Izoh (0)