“O‘zatom” agentligi “Chernobil tabiat uchun jannatga aylangan”i haqidagi surat yuzasidan izoh berdi

Ijtimoiy tarmoqlarda “O‘zatom” agentligi logotipi tushirilgan va “Chernobil hududi tabiat uchun jannatga aylandi” deb yozilgan slayd surati tarqalib, bu holat bahs-munozaralarni keltirib chiqargan edi. “O‘zatom” agentligi ushbu holat yuzasidan rasmiy bayonot berdi.

Ma’lum qilinishicha, 18-yanvar kuni Toshkentdagi Vestminster xalqaro universitetida “O‘zbekistonda energetika sohasini rivojlantirish istiqbollari” mavzusida ochiq muloqot bo‘lib o‘tgan. Unda Chernobil AES yon-atrofidagi tark etish zonasi misolida radiatsiya va nurlanishning turli genetik mutatsiyalarga hamda tabiatga salbiy ta’siri to‘g‘risida slayd ko‘rsatilgan, biroq bu slayd, agentlikning qayd etishicha, ijtimoiy tarmoqlarda “noto‘g‘ri talqin qilinmoqda”.

“O‘zatom” agentligining ma’lum qilishicha, ochiq muloqotda chiqish qilgan ma’ruzachi bu slayd bilan quyidagicha fikr bildirmoqchi bo‘lgan:

Hozirgi kunda atom energetikasi va yadroviy texnologiyalardan foydalanish sohasi atrofida haqiqatga zid ko‘plab afsonalar tarqalgan. Shunday afsonalardan biri — radiatsiyaning ta’siri natijasida naslda genetik o‘zgarishlar hosil bo‘lishi.

Tarixda katta miqdordagi radiatsiyaning aholi va tabiatga ta’siri holatlari yuz bergan. Masalan, Chernobil o‘rmonlarida ikki kallali hayvonlar yoki mutantlar yashashi to‘g‘risida afsona mavjud. Yoki Yaponiyada Xirosima va Nagasaki shaharlari bombardimon qilingandan so‘ng genetik o‘zgarishlar bilan bolalar tug‘ilgani haqida afsona mavjud.

Keyingi slaydlardan ko‘rinib turibdiki, Chernobil AESning tark etish zonasida hozirda odamlar yashamaydi, u yerda hech qanday xo‘jalik faoliyati amalga oshirilmaydi va shu sababli tabiat gullab yashnamoqda.

“O‘zatom” agentligi