Suriyada xalq hududdan chiqib ketayotgan AQSh harbiylarini tosh va sabzavotlar otib kuzatib qo‘ydi (video)

Suriya shimoli-sharqidagi Kamishli shahrida odamlar mamlakatdan chiqib ketayotgan AQSh harbiylari bo‘lgan karvon yo‘lini to‘sdi va ularga duch kelgan narsani uloqtirdi. Bu haqda “TASS” xabar bermoqda.

Shahar aholisi amerikalik harbiylar ketayotgan kolonnaga toshlar, pomidorlar va boshqa sabzavotlarni uloqtirgan. Ular shunday qilish orqali AQShning Turkiya harbiy harakatlari sabab hududni tark etayotganiga o‘z e’tirozini bildirgan.

9-oktabrda Turkiya Suriya bilan chegara hududida Kurdiston ishchi partiyasi, “Suriya demokratik kuchlari” kurd jangarilari hamda IShID terrorchilariga qarshi “Tinchlik bulog‘i” operatsiyasini boshlagan. Anqara Suriya shimoli-sharqidan kurdlarni quvib chiqarish orqali u yerda qochoqlar uchun “xavfsiz hudud” tashkil qilishni maqsad qilgan. 18-oktabrda Turkiya va AQSh o‘rtasida Anqarada o‘tkazilgan muzokaralardan keyin Anqara kurdlarga chegaradan uzoqlashishi uchun 120 soat muxlat berdi.13-oktabrda Pentagon rahbari Mark Esper Turkiyaning harbiy harakatlari sabab ming nafar AQSh harbiylarining Suriya hududidan olib chiqib ketilishini ma’lum qilgan. 16-oktabr AQSh boshqaruvidagi xalqaro koalitsiya Aleppodan 150 km uzoqlikda Kobanida joylashga o‘z harbiy bazasini vayron qildi hamda mamlakatning shimoli-sharqidagi Rakka va Tabku shaharlarini tashlab chiqib keta boshladi. Keyinchalik amerikalik harbiylarning Iroqning Dahuk viloyati tomon yo‘l olganligi ma’lum qilindi.