Suriyada Damashq universitetidan keyin ikkinchi eng katta oliy o‘quv dargohi bo‘lgan Aleppo dorilfununida 2 mingdan ortiq talabalar amerikalik harbiylarning mamlakat hududida bo‘lishiga qarshi norozilik namoyishi o‘tkazmoqda. Bu haqda “RIA Novosti” xabar berdi.
“Biz o‘zimiz yurtimizga chaqirmagan AQSh askarlarining Suriyada qolishiga qarshimiz. Shu sababli ularning vatanimizdan chiqib ketishini talab qilamiz. Amerikaliklar terrorizmga qarshi kurashish uchun kelganmiz deb, amalda buning teskarisini qilmoqda. Ular jangari guruhlarga davlat sifatidagi yaxlitligimizni buzish uchun turli yo‘llar bilan yordam berib kelgan”, — deya qayd etgan universitetning texnika fanlari fakulteti dekani Abdurahmon Shayx Abdul.
Uning so‘zlariga ko‘ra, norozilik namoyishlarida nafaqat talabalar va o‘qituvchilar, balki Suriya taqdiriga befarq bo‘lmagan shahar fuqarolari ham ishtirok etmoqda. Namoyishchilar “Bizga Amerikaning yordami kerak emas, Suriyaga chin do‘st sifatida yordam beruvchilar ham bor” degan mazmundagi Rossiya va boshqa ittifoqdosh davlatlarni maqtash mazmunidagi bannerlar ko‘tarib olgan.
Suriyaliklardan tashqari universitetdagi Aleppoda tahsil olayotgan xorijlik talabalar, qo‘shni davlatlar Livan, Yaman va Falastindan kelganlar ham hududdan AQSh harbiylarining chiqarib yuborilishini talab qilmoqda.
“Bir necha yildan beri shu yerda yashaymiz va so‘nggi vaqtlarda Suriya xalqiga qanchalik og‘ir bo‘layotganini his qilib turibmiz. Biz, boshqa qo‘shni mamlakatlar xalqlari ham AQSh bu yerdan ketishi kerak degan fikrda ekanligini bildirish uchun ushbu norozilik harakatlarida ishtirok etyapmiz”, — deydi yamanlik talaba Abdulhakim Hamdon.
9-oktabrda Turkiya prezidenti Rajab Toyyib Erdo‘g‘on Suriya shimoli-sharqida Kurdiston ishchi partiiyasi, “Suriya demokratik kuchlari” va IShID jangarilariga qarshi “Tinchlik bulog‘i” harbiy operatsiyasining boshlanganligini e’lon qilgan. Harbiy harakatlar boshlangach, AQSh qo‘shini qariyb ikki yil faoliyat olib borgan Aleppodagi ikki harbiy bazasini tark etgan. Hozirda ushbu ikki obyekt Suriya hukumati armiyasi va Rossiya harbiy politsiyasi ixtiyoriga o‘tgan.
Mavzuga doir:
AQSh boshqaruvidagi xalqaro koalitsiya Suriya hamda Iroq hududida 2014-yildan buyon IShID terrorchilariga qarshi operatsiyalar o‘tkazib keladi va rasmiy Damashq ushbu harbiy ittifoq faoliyatini tan olmagan. 2018-yilning dekabr oyida AQSh prezidenti Donald Tramp amerikalik harbiylarning Suriya hududidan chiqib ketishini ma’lum qildi, ammo u bu ishning qachon sodir bo‘lishiga aniqlik kiritmagan.
Izoh (0)