Afg‘oniston Islom partiyasi rahbari va saylovlarda prezidentlikka o‘z nomzodini qo‘ygan Gulbeddin Hikmatyor saylovlarni qayta o‘tkazish uchun muvaqqat hukumat tashkil etishni taklif qildi, deb yozmoqda “Afghanistan.ru”.
Kobulda o‘tgan matbuot anjumanida siyosatchi saylovchilarning ovoz berishda faol bo‘lmagani va birinchi turda hech bir nomzod prezident sifatida saylanish uchun kerakli miqdordagi ovozlarni to‘play olmasligini ma’lum qildi.
Hikmatyor nomzodlarning biriga 1 million atrofida biometrik bo‘lmagan saylov varaqalari tashlanganligini bildirdi. Shuningdek, u boimetrik ro‘yxatga olish tizimi ishini noto‘g‘ri yo‘lga qo‘ygani va saylovlar natijalarini e’lon qilishda kechikgani uchun Afg‘onistonning Mustaqil saylov komissiyasi faoliyatini tanqid qildi.
Islom partiyasi yetakchisi jahon hamjamiyatiga nisbatan ham tanqidiy fikrlar bildirdi va ayrim xorijiy diplomatlarni saylovlar jarayoniga aralashganlikda aybladi.
“Saylovlar xalq fikrini hurmat qiladigan va saylov kampaniyasi uchun davlat resurslaridan o‘z manfaati yo‘lida foydalanmaydigan xolis hukumat nazorati ostida o‘tishi lozim. Bunday inqiroz holatlarini bartaraf qilish uchun mamlakatda muvaqqat hukumat tashkil etish lozim”, — deya ta’kidlagan Hikmatyor.
Afg‘onistonda prezidentlik uchun saylovlar sentabr oyida o‘tkazilgan va ularda saylovchilarning ovozini biometrik ro‘yxatga olish tizimidan foydalanilgandi. Biometrik ma’lumotlar asosida ovoz berish jarayoni o‘tgan yili parlament uchun o‘tkazilgan saylovlarda sinovdan o‘tkazilgan va ovozlar sonini qalbakilashtirishning oldini olish maqsadida prezidentlik saylovlarida ham ushbu tizimdan foydalanilgandi.
Ammo bu safar ham 2018-yildagi kabi biometrik uskunalardagi muammo sabab saylovning dastlabki natijalarini e’lon qilish kechikmoqda. Afg‘oniston mustaqil saylov komissiyasi 19-oktabrda ushbu kechikish texnik muammolar sabab kuzatilganini e’lon qilgan va saylovchilardan uzr so‘ragan.
Mavzuga doir:
Izoh (0)