Сурияда халқ ҳудуддан чиқиб кетаётган АҚШ ҳарбийларини тош ва сабзавотлар отиб кузатиб қўйди (видео)

Сурия шимоли-шарқидаги Камишли шаҳрида одамлар мамлакатдан чиқиб кетаётган АҚШ ҳарбийлари бўлган карвон йўлини тўсди ва уларга дуч келган нарсани улоқтирди. Бу ҳақда «ТАСС» хабар бермоқда.

Шаҳар аҳолиси америкалик ҳарбийлар кетаётган колоннага тошлар, помидорлар ва бошқа сабзавотларни улоқтирган. Улар шундай қилиш орқали АҚШнинг Туркия ҳарбий ҳаракатлари сабаб ҳудудни тарк этаётганига ўз эътирозини билдирган.

9 октябрда Туркия Сурия билан чегара ҳудудида Курдистон ишчи партияси, «Сурия демократик кучлари» курд жангарилари ҳамда ИШИД террорчиларига қарши «Тинчлик булоғи» операциясини бошлаган. Анқара Сурия шимоли-шарқидан курдларни қувиб чиқариш орқали у ерда қочоқлар учун «хавфсиз ҳудуд» ташкил қилишни мақсад қилган. 18 октябрда Туркия ва АҚШ ўртасида Анқарада ўтказилган музокаралардан кейин Анқара курдларга чегарадан узоқлашиши учун 120 соат мухлат берди.13 октябрда Пентагон раҳбари Марк Эспер Туркиянинг ҳарбий ҳаракатлари сабаб минг нафар АҚШ ҳарбийларининг Сурия ҳудудидан олиб чиқиб кетилишини маълум қилган. 16 октябрь АҚШ бошқарувидаги халқаро коалиция Алепподан 150 км узоқликда Кобанида жойлашга ўз ҳарбий базасини вайрон қилди ҳамда мамлакатнинг шимоли-шарқидаги Ракка ва Табку шаҳарларини ташлаб чиқиб кета бошлади. Кейинчалик америкалик ҳарбийларнинг Ироқнинг Даҳук вилояти томон йўл олганлиги маълум қилинди.