Eron admirali "Tinchlik bulog'i" operatsiyasini AQShning IShID qayta “tug'ilishi” uchun qilgan fitnasi deb atadi

Eron milliy xavfsizlik ittifoqining kotibi Ali Shamxoniy Turkiyaning Suriya shimoli-sharqida amalga oshirgan “Tinchlik bulog‘i” harbiy operatsiyasini Yaqin Sharqda IShIDning qayta paydo bo‘lishi uchun AQSh tomonidan amalga oshirilgan fitna ekanligini ta’kidladi. Bu haqda “Iran.ru” xabar berdi.

Shamxoniy mintaqadagi millatlarni ogohlikka va bu kabi fitnalarga qarshi kurashish, ushbu jarayonda birlashgan holda niyati ezgu bo‘lmagan xorij davlatlariga qarshi turishga chaqirdi.

Shuningdek, forslar admirali terrorchilik muammosiga ikki xil qarash vujudga kelganligini qayd etib, Suriyaning shimoli-g‘arbidagi Idlib viloyatida ro‘y berayotgan hodisalarni qoraladi.

Turkiya 9-oktabrda Suriya shimoli-sharqida Kurdiston ishchi partiyasi, Suriya demokratik kuchlari hamda IShID guruhlariga qarshi “Tinchlik bulog‘i” harbiy operatsiyasini boshlagan. Ushbu harakatlar oldidan va urush boshlanganidan keyin dunyo davlatlari, jumladan, Arab millatlar ligasiga a’zo mamlakatlar, Yevropa ittifoqi, Eron, Misr, Iroq, Buyuk Britaniya, AQSh, Germaniya, Fransiya, Belgiya, Estoniya, Kanada va boshqa davlatlar Anqaraning ushbu harakatlarini qoralagan. 17-oktabr, payshanba kuni Turkiya prezidenti Rajab Toyyib Erdo‘g‘on va AQSh vitse-prezidenti Maykl Pens o‘rtasida Anqarada o‘tkazilgan muzokaralardan keyin kelishuv tuzilgan. Unga ko‘ra, turklar kurdlar Suriya bilan chegara hududidan uzoqlashishi uchun 120 soat davomida “Tinchlik bulog‘i” operatsiyasini to‘xtatib turishni va’da bergan.

Suriyadagi kurd jangarilari “Suriya demokratik kuchlari” guruhi koalitsiya tarkibida mamlakatdagi IShID terrorchilariga qarshi kurashda ular ustidan qozonilgan g‘alabada ulkan ulush qo‘shgan.

Avval Erin sud tizimi rahbari Ibrohim Raisiy ham Turkiyaning Suriya hududidagi harakatlar IShIDning uyg‘onishiga sabab bo‘lishi mumkinligidan xavotirda ekanligini qayd etgan.

Shamxoniy Saudiya Arabistoni sohillari yaqinida Jidda porti yonida Sabiti tankeriga hujum uyushtirganlarga nisbatan Tehronning javobi ham shiddatli bo‘lishini eslatdi.

U xalqaro suv yo‘llarida xavfsizlikning ta’minlanmaganligi hududda inqirozning yuzaga kelishiga sabab bo‘layotganligini ma’lum qildi.

“Mintaqadagi chigal vaziyatni yanada og‘irlashtirish maqsadida Qizil dengizda Eron neft tankeriga uyushtirilgan raketalar hujumi uchun munosib va raqibni afsus-nadomat chekishga majbur qiladigan javob qaytaradi”, — deya ta’kidlagan Eron admirali.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.