Chili prezidenti Sebastyan Pinyera mamlakatda yuz berayotgan tartibsizliklarni urush bilan qiyosladi. Bu haqda “TASS” xabar bermoqda.
“Biz urush sharoitidamiz. Qudratli va shafqatsiz, zo‘ravonlikka tayyor, hatto inson hayoti ham ahamiyatli bo‘lmagan dushmanga egamiz. Jinoyatchi guruhlarga xos tashkilotchilikni, har bir xatti-harakat muvofiqlashtirilayotganini ko‘rmoqdamiz. Barcha siyosiy kuchlarni zo‘ravonlik holatlarini qoralashga chaqiraman”, — dedi Pinyera televideniye orqali murojaati davomida.
Chili poytaxti Santyagoda tartibsizlik va politsiya bilan to‘qnashuvlarga aylanib ketgan norozilik namoyishlari 14-oktabr kuni, metroda qatnov narxi o‘rtacha 30 pesoga (0,04 dollar) ko‘tarilganidan so‘ng boshlandi. Keyinchalik tartibsizliklar mamlakatning boshqa shaharlariga ham tarqaldi. O‘t qo‘yishlar va talon-torojlar oqibatida kamida 7 kishi halok bo‘ldi.
Yuzaga kelgan vaziyat tufayli poytaxt va qator shaharlarda favqulodda holat e’lon qilindi. Sebastyan Pinyera jamoat transportida yo‘lkira narxlari oshirilishini bekor qildi.
Izoh (0)