Rossiya Minsk kelishuvlarini bajarish o‘rniga Donbassdagi ayirmachi kuchlarni qurollantirishda davom etmoqda. Bu haqda AQShning BMTdagi doimiy vakili o‘rinbosari Jonatan Koen ma’lum qildi, deya xabar beradi Forum Daily.
“Rossiyaning Ukrainaga qarshi tajovuzi boshlanganiga beshinchi yil ketmoqda. Minglab odam halok bo‘ldi, 1,5 million kishi uyini tark etdi. Aynan Rossiya bu mojaroga chek qo‘yishi kerak. Ukraina sharqi va Qrimdan qurolli kuchlarning olib chiqilishi AQSh rozi bo‘ladigan yagona yakun”, — ta’kidladi diplomat.
Koen AQSh Ukraina Donbass va Qrimda o‘z nazoratini o‘rnatmagunicha Rossiyaga nisbatan joriy etilgan sanksiyalarni bekor qilmasligini bildirdi. Shuningdek, Rossiyani o‘tgan yil noyabr oyida Qora dengizda qo‘lga olingan Ukraina kemalarini qaytarish va ukrainalik dengizchilarni qo‘yib yuborishga chaqirdi.
Izoh (0)