Buyuk Britaniyaning nufuzli The Independent gazetasida “Yo‘qolgan dengiz tarixi” nomli maqola chop etildi. Bu haqda “Xalq so‘zi Online” xabar bermoqda.
Britaniyalik jurnalistlarning fikricha, bir paytlar moviy dengiz bo‘lgan Orol endilikda qurib borayotgan suv omboriga aylandi. Ushbu muammo shunchaki mahalliy miqyosdagi fojia emas, balki umumbashariy xavfdir. Orol hududidan ko‘tarilgan tuzlar dunyoning turli davlatlari va mintaqalariga yetib borayotir.
1992-yili tashkil etilgan Orolni qutqarish xalqaro jamg‘armasi faoliyatiga to‘xtalar ekan, nashrda mazkur tuzilma doirasida qishloq xo‘jaligi ekinlarini ekish, hudud aholisining yashash sharoitini yaxshilash, yer va suv resurslarini asrab-avaylash borasida qator chora-tadbirlar amalga oshirilgani qayd etiladi.
Xitoy mediakorporatsiyasida tarqatilgan xabarda ma’lum qilinganidek, mintaqa davlatlari rahbarlari Orolni qutqarish xalqaro jamg‘armasi faoliyatini takomillashtirish, mintaqadagi ekologik vaziyatni yaxshilash, suv resurslarini muvofiqlashtirgan holda boshqarish, bu borada mamlakatlararo hamkorlikni mustahkamlash masalalariga e’tibor qaratdi.
AQShning The New York Times gazetasida esa so‘nggi yillarda Orol atrofi xorijlik sayyohlarda tobora katta qiziqish uyg‘otayotgani e’tirof etiladi.
“Dunyoning turli nuqtalaridan kelgan mehmonlar bu yerdagi manzaradan hayratga tushmoqda. Ijtimoiy tarmoqlarda mazkur hududdagi kemalar yonida tushilgan rasmlar tobora ommalashmoqda. Keyingi paytlarda bu yerda mehmonxonalar soni ortyapti. 14-sentabrda Mo‘ynoqda elektron musiqa festivali o‘tkazilishi kutilmoqda”, — deyiladi maqolada.
Izoh (0)