Jinoyat ishlari bo‘yicha Jizzax viloyati Yangiobod tuman sudi fuqaro E.Mga nisbatan ochilgan jinoyat ishini ko‘rib chiqdi. Bu haqda sud axborot xizmati “Daryo”ga xabar bermoqda.
Jinoyat ishida to‘plangan hujjatlarga ko‘ra fuqaro E.M. xavfli retsidivist bo‘la turib, takroran 5-iyundan 25-iyun kuniga qadar o‘zganing mol-mulkini yashirin ravishda o‘g‘irlik yo‘li bilan talon-taroj qilish maqsadida tanishi K.Rning uyiga ilgaridan o‘g‘rilik qilish niyatida yasatib olib qo‘ygan eshik kaliti bilan uy eshigini ochib kirib, uyda hech kim yo‘qligidan foydalanib, uyga kirgan.
Fuqaro uydan 300 000 so‘mlik bir dona katta hajmli mantiqozonni, 300 000 so‘mlik ikki dona kichik hajmli mantiqozonlarni, 270 000 so‘mlik besh dona har-xil kattalikdagi qozonlarni, 160 000 so‘mlik to‘rt dona tovalarni, 350 000 so‘mlik bir dona choyshabni, 70 000 so‘mlik bir dona soch olish apparatini, 800 000 so‘mlik bir dona fransuz atrini, 25 000 so‘mlik besh juft paypoqlarni, 15 000 so‘mlik ikki dona prostinalarni, 80 000 so‘mlik to‘rt dona sochiqlarni, 90 000 so‘mlik uch dona kichik hajmli radiolarni, 45 000 so‘mlik bir dona ayollar koftasini, 700 000 so‘mlik bir dona Nokia rusumli telefon apparatni, 2 000 000 so‘mlik bir dona Samsung rusumli telefon apparatini, 800 000 so‘mlik telefon apparati ehtiyot qismlarni, 350 000 so‘mlik bir dona kampot chiqaruvchi apparatni, 50 000 so‘mlik bir dona dazmolni, 47 000 so‘mlik bir dona ayollar sumkasini,45000 so‘mlik uch dona sapol tavoqlarni, 70 000 so‘mlik bir dona suv idishni,700 000 so‘mlik bir dona 5x4 metrli gilamni, 540 000 so‘mlik ikki dona 3x4 metrli gilamlarni, 350 000 so‘mlik bir dona kichik hajmli qizil rangli gilamni va 800 000 so‘mlik bir dona to‘k pechlarni yashirin ravishda o‘g‘irlab, voqea joyidan g‘oyib bo‘lgan.
Sud majlisi E.M. o‘z aybiga iqrorlik bildirib 2018-yil may oyida tanishi K.R.ni uyiga mehmondorchilikka borib, uyiga qaytish vaqtida uni uyining eshigi kalitini bildirmasdan olib ketganligi, ertasi kuni Jizzax shahridagi Ko‘k bozorga borib, uy kalitidan o‘ziga nusxa yasatib olib, so‘ng kalitni K.R.ga olib borib bolasi kalitni ko‘tarib ketib qolganligini aytib, berib ketganligi, shundan so‘ng oradan bir hafta o‘tib, u K.R.ning uyiga borib, uyida hech kim yo‘qligidan foydalanib, yasatib olgan kaliti bilan uy eshigini ochib, uy ichkarisidagi bo‘lgan uy jihozlari va buyumlarni o‘g‘irlab ketganligini bayon qildi.
Jinoyat ishlari bo‘yicha Jizzax viloyati Yangiobod tuman sudining hukmi bilan fuqaro E.M. O‘zbekiston Respublikasi Jinoyat kodeksining 169-moddasi (o‘g‘rilik) 3-qismining “a” bandida nazarda tutilgan jinoyatni qasddan sodir etganlikda aybli deb topilib, Jinoyat kodeksining 57-moddasi (yengilroq jazo tayinlash) qo‘llanib uch yil muddatga ozodlikni cheklash jazosi tayinlandi.
Izoh (0)