Agrippina Shin maktabgacha ta’lim vazirligi shu kungacha erishgan yutuqlari haqida ma’lumot berdi

27-avgust kuni Maktabgacha ta’lim vazirligi tomonidan maktabgacha ta’lim tizimi pedagog va rahbar xodimlarining birinchi yillik konferensiyasi o‘tkazildi. Bu haqda vazirlik matbuot xizmati “Daryo” ga ma’lum qildi.

Yangi o‘quv yili arafasida Maktabgacha ta’lim vazirligi “2018–2019 o‘quv yilida maktabgacha ta’lim tizimini rivojlantirishining strategik ustuvorliklari – hammaboplik va sifat” birinchi yillik anjumanini o‘tkazdi.

Plenar sessiyaning interaktiv video-formati zalga yig‘ilgan 140 nafar maktabgacha ta’lim xodimlarinigina emas, balki mamlakatning barcha mintaqalaridagi 5 mingdan ziyod mutaxassislarni ham qamrab olish imkonini beradi. Nodavlat maktabgacha ta’lim muassasalari rahbarlari, Oliy va o‘rta maxsus ta’lim vazirligi, Xalq ta’limi vazirligi, Ta’lim sifatini nazorat qilish davlat inspeksiyasi, Nizomiy nomidagi Toshkent davlat pedagogika universiteti, Toshkentdagi Puchon (Koreya) universiteti filiali, shuningdek UNESCO, UNICEF va Jahon banki vakillari tadbir mehmonlari bo‘ldi.

“2018–2019 o‘quv yilida maktabgacha ta’lim tizimini rivojlantirishning strategik ustuvorliklari – hammaboplik va sifat” taqdimoti bilan O‘zbekiston Respublikasi maktabgacha ta’lim vaziri Agrippina Shin ma’ruza qildi. O‘z chiqishida vazir maktabgacha ta’lim vazirligining qator yutuqlarini qayd etdi:

• 27 ta normativ-huquqiy hujjat qabul qilish orqali maktabgacha ta’lim huquqiy bazasi yaxshilandi;
• Maktabgacha ta’lim muassasalari moddiy-texnik bazasi mustahkamlanmoqda va tarmog‘i kengaytirilmoqda. 2018-yilda ta’mirlanayotgan maktabgacha ta’lim muassasalari soni 2017-yildagiga qaraganda qariyb 3 barobarga (105 taga nisbatan 298 ta), yangi qurilish obyektlari soni esa, 2 tadan 40 taga o‘sdi.
• Nodavlat maktabgacha ta’lim muassasalari tarmog‘i kengaymoqda, ular soni 568 taga yetdi.
• Davlat-xususiy sheriklik tamoyili asosida tashkil etilgan maktabgacha ta’lim muassasalari soni jadal ortmoqda – bugungi kungacha davlat-xususiy sheriklik to‘g‘risida 741 ta kelishuv imzolandi.
• Pedagoglar va tarbiyachilar malakasini oshirish ishlari o‘tkazilmoqda. 2018-yilda 9 mingdan ziyod xodim qayta tayyorlandi.
• “Bolani maktabgacha ta’lim muassasasiga navbatga qo‘yish” interaktiv xizmati yo‘lga qo‘yildi.
• Maktabgacha ta’lim pedagoglari bazaviy tarif stavkalari 2 barobarga oshirildi.
• Vazirning 2018-yil 15-iyuldagi buyrug‘iga ko‘ra, hisobotlar hajmi sezilarli qisqartirildi.
• Maktabgacha ta’lim boshqaruvi axborot tizimi (EMIS) joriy etildi.

Amaliy sessiya Mirobod tumanidagi 34- son va 164- son maktabgacha ta’lim muassasalarida o‘tkazildi, u yerda oltitta mavzudagi: “Autsorsing uslubida bolalar uchun sog‘lom va xavfsiz ovqatlanishni tashkil etish”, “Maktabgacha ta’lim muassasasida innovatsion ta’lim muhitini tashkil etish”, “Open EMIS ta’lim boshqaruvi axborot tizimini joriy etish”, “Tabiatda ta’lim faoliyatidan lavha”, “Maktabgacha ta’lim muassasalaridagi tarbiya-ta’lim jarayonlarida multimedia texnologiyalarini qo‘llash” va “Maktabgacha ta’lim muassasalaridagi rivojlantirish markazlarini jihozlashga ijodiy yondashuv” maydonlari tashkil etildi. Olingan tajriba har bir mintaqa va maktabgacha ta’lim muassasasining sharoitidan kelib chiqib, amalda qo‘llaniladi.

Tadbir o‘tgan davr yakunlarini chiqarish, “o‘sish nuqta”larini belgilash va kelgusi o‘quv yili uchun asosiy vazifalarni belgilash imkonini berdi. Konferensiya maktabgacha ta’lim sohasida davlat siyosatini amalga oshirish masalalarini muhokama qilish uchun samarali bahs-munozara maydoni bo‘ldi.