Farg‘ona shahridagi Alisher Navoiy nomli mahallada yozgi ta’tilda bolalarning bo‘sh vaqtini mazmunli o‘tkazish, ular o‘rtasida jinoyat va huquqbuzarliklar sodir etilishining oldini olish maqsadida ko‘rik-tanlov o‘tkazildi. Bu haqda “Daryo” muxbiri Azizjon Ermatov xabar berdi.
Hudud profilaktika inspektori, kapitan Shavkatjon Yo‘ldoshev tomonidan mahalla faollari ko‘magida o‘tkazilgan tanlovda yozgi ta’tilda oromgohlarga bormagan o‘quvchi-yoshlar ishtirok etdi.
Tanlov uchta yo‘nalishda o‘tkazildi. Birinchi yo‘nalishda bolalar qo‘l mehnati asosida turli hunarmandchilik mahsulotlari namunalarini yasadi. Ikkinchi yo‘nalishda yosh rassomlar o‘z mahoratlarini rang-tasvir va bo‘yoqlar yordamida sinovdan o‘tkazdi. Uchinchi yo‘nalishda esa yosh dizaynerlarning innovatsion loyiha va maketlari namoyish etildi.
Profilaktika inspektori yaqin kunlarda yosh kitobxonlar o‘rtasida ham ana shunday tanlov o‘tkazish niyatida.