O‘zbekiston Tashqi savdo vazirligi huzuridagi “O‘zbekekspertiza” aksiyadorlik jamiyati tomonidan O‘zbekiston tashqi iqtisodiy tovar nomenklaturasi asosida izlash dasturi va eksport-import sohasi vakillari uchun kerakli ma’lumotlarni o‘z ichiga olgan Telegrambot yo‘lga qo‘yildi. Bu haqda vazirlik axborot xizmati xabar bermoqda.
“Biz zamonaviy texnologiyalar orqali maqsadli auditoriyamiz bilan ishimizni takomillashtirmoqdamiz. Telegram-bot eksport va import uchun zarur bo‘lgan hujjatlarni rasmiylashtirish jarayonini yengillashtiradi. Mazkur bot bor-yo‘g‘i ikki klik orqali tovar nomenklaturasi asosida mahsulot klassifikatsiyasini topish, shuningdek “O‘zbekekspertiza” AJ faoliyati va xizmatlari haqida kerakli ma’lumot olish imkonini beradi”, — deya ta’kidlaydi aksiyadorlik jamiyati bosh direktori Ulug‘bek Abdug‘aniyev.
Ushbu Telegram-bot yordamida tashqi iqtisodiy faoliyat ishtirokchilari quyidagi imkoniyatlarga ega bo‘ladi:- Tovar nomenklaturasi kodlari va nomlarini izlash uchun kerakli vaqtni qisqartirish;
- “O‘zbekekspertiza” AJ vakillariga to‘g‘ridan to‘g‘ri murojaat qilish;
- “O‘zbekekspertiza” AJ xizmatlariga onlayn-arizalardan foydalanish.
“Mazkur botdan foydalanish uchun Telegram messenjeri izlash qatorida @uzbekexpertiza_bot nomini kiritish va botni “Start” buyrug‘i orqali ishga tushirish kifoya”, — deyiladi xabarda.
Izoh (0)