Rossiya, Germaniya va Yevropa Komissiyasi “Boltiq dengizi hududi” hamkorligi bo‘yicha transchegaraviy dasturning moliyaviy bitimini imzoladi, deb xabar berdi “RIA Novosti”.
Ma’lumotlarga ko‘ra, tomonlarning har biri 4,4 million yevrodan ajratadi. Yevropa mintaqaviy rivojlanish jamg‘armasining budjet dasturidan ajratilgan 263,8 million yevroga yana qo‘shimcha 8,8 million yevro qo‘shiladigan bo‘ldi.
Hamkorlik dengiz ekotizimini saqlab qolish, transport kommunikatsiyasini rivojlantirish va iqlim o‘zgarishiga qarshi kurashish kabi bir qator yo‘nalishlarni o‘z ichiga qamrab oladi.
Loyihada Rossiya va Germaniyadan tashqari Finlyandiya, Estoniya, Litva, Latviya, Shvetsiya, Daniya va Norvegiya ishtirok etadi.
Yevropa Ittifoqining Moskvadagi elchisi Markus Ederer Rossiya va Yevropa Ittifoqining hozirgi geosiyosiy vaziyatda hamkorlik qilish imkoniyatlarini yuqori baholab, mazkur bitimning imzolanishini ma’qulladi.
Izoh (0)