Janubiy Koreya prezidenti Mun Chje In 10-fevral, shanba kuni qishki Olimpiada ochilish marosimiga tashrif buyurgan KXDR delegatsiyasi bilan uchrashdi. Bu haqda “RIA Novosti” xabar bermoqda.
Shimoliy Koreya delegatsiyasiga mamlakatning rasmiy rahbari, Oliy xalq yig‘ini (parlament) prezidiumi raisi Kim Yon Nam boshchilik qildi, uning tarkibiga esa KXDR yetakchisining singlisi Kim Yo Chjon kirdi.
Delegatsiya tarkibi Koreya urushi tamomlanganidan beri eng yuqori martabali bo‘ldi. Shuningdek, KXDR yetakchisi oilasi a’zosi tarixda ilk bor Janubiy Koreyaga tashrif buyurdi.
Mun Chje In KXDR delegatsiyasini prezident saroyida qabul qildi. Tomonlar bir-biri bilan qo‘l berib ko‘rishdi. Uchrashuv yakunlanganidan so‘ng delegatsiya Janubiy Koreya prezidenti ularning sharafiga uyushtirgan tushlikka yo‘l oladi.
Shimoliy Koreya delegatsiyasi 11-fevral, yakshanba kuni tashrifini yakuniga yetkazadi va vataniga qaytib ketadi.
Izoh (0)