Toshkent shahar bojxona boshqarmasi tomonidan tarixiy ahamiyatga ega tangalarni pochta jo‘natmalari orqali O‘zbekistonga olib kirishga bo‘lgan urinishlar fosh qilindi, deb xabar beradi bojxona qo‘mitasi matbuot xizmati.
Toshkent shahar bojxona boshqarmasining “Bosh pochtamt” tashqi iqtisodiy faoliyat bojxona posti xodimlari Isroil davlatidan Samarqand shahrida istiqomat qiluvchi M. Bozorov nomiga yuborilgan pochta jo‘natmasini belgilangan tartibda bojxona ko‘rigidan o‘tkazganida, jo‘natmadagi buyumlar orasida og‘irligi 58 grammdan ortiq bo‘lgan 9 dona turli tarixiy tilla tangalar borligi aniqlandi.
“Madaniyat vazirligining badiiy ekspertlari xulosasiga ko‘ra, o‘tgan asrning boshlarida Chor Rossiyasi va Buyuk Britaniyada zarb qilingan tangalarning qalbaki nusxalari ekanligini hamda asillik darajasi 750 va 900 bo‘lgan ushbu tilla tangalarning umumiy qiymati salkam 16 million 700 ming so‘mni tashkil qilar ekan”, — deyiladi xabarda.
Shuningdek, mazkur post xodimlari Rossiyadan toshkentlik Konstantin Trimasov nomiga yuborilgan pochta jo‘natmasida ham bojxona deklaratsiyasida ko‘rsatilmagan 108 dona turli yillarga mansub tangalar borligini aniqladi.
Ekspertlar tomonidan turli davlatlarda zarb qilingan ushbu tangalarning 10 tasi o‘tgan asrning o‘rtalarida zarb qilingani va shu sababli tarixiy ahamiyatga ega ekanligi yuzasidan xulosa qilingan.
Yuqoridagi har ikki holat bo‘yicha ashyoviy dalil sifatida olingan tangalar Mirobod tumani ma’muriy ishlar bo‘yicha sudi qaroriga asosan davlat egaligiga o‘tkazildi.
Izoh (0)