Farg‘onadan Haj ziyoratiga boradigan 950 nafar fuqaro saralandi

Farg‘ona viloyatida Haj ziyoratiga borishga nomzod fuqarolar Vazirlar Mahkamasining 2017-yil 28-dekabrdagi qaroriga asosan tasdiqlangan Haj va Umra tadbirlarini tashkil etish va o‘tkazish tartibi to‘g‘risidagi Nizomda nazarda tutilgan talablar asosida suhbatdan o‘tkaziladi va saralanadi. Bu haqda Farg‘ona viloyati hokimligi “Daryo”ga ma’lum qildi.

Nizomga muvofiq, mahalla fuqarolar yig‘ini raisi tomonidan nomzodlarning alohida ro‘yxati shakllantirildi. Nomzodlarga ular suhbatdan o‘tkazish va saralash uchun ro‘yxatga qo‘shilganligi hamda suhbatdan o‘tkazish sanasi va joyi to‘g‘risida xabar berildi. Joylardagi tuman (shahar) hokimi tomonidan tuzilgan, 7 kishidan iborat ishchi guruh har oyning 5-sanasidan kech bo‘lmagan muddatda shakllangan ro‘yxat asosida Hajga boradigan ziyoratchi sifatida navbatga qo‘yish uchun nomzodlarni suhbatdan o‘tkazdi va saraladi.

Saralashdan so‘ng Hajga borishga navbatga qo‘yiladigan nomzodlar ro‘yxati tegishli hududdagi masjid va fuqarolarning o‘zini o‘zi boshqarish organlari binolarida e’lon qilindi va 15 kun mobaynida ular bo‘yicha jamoatchilik fikri o‘rganiladi. Jamoatchilik tomonidan bildirilgan taklif yo e’tirozlar ishchi guruh tomonidan 5 kun muddatda ko‘rib chiqildi va tekshirildi. Shundan so‘ng, ishchi guruh jamoatchilik fikri asosida fuqaroni Hajga boruvchi sifatida navbatga qo‘yish uchun fuqarolarning o‘zini o‘zi boshqarish organiga 1 kun muddatda tavsiya berdi.

Xabar berishlaricha, Hajga borishga navbatga qo‘yiladigan nomzod moddiy va jismoniy jihatdan unga qodir bo‘lishi, amallarni to‘g‘ri va to‘la-to‘kis ado etish uchun yetarli diniy bilimga ega bo‘lishi, ma’naviyati, ma’rifati va odob-axloqi bilan mahallada obro‘-e’tiborli bo‘lishi kabi talablarga javob berishi kerak. Shuningdek, kiritilgan o‘zgartirishlarga ko‘ra, Hajga bormoqchi bo‘lgan fuqaro avval Hajga bormagan bo‘lishi lozim (oldingi talabda so‘nggi 5 yil inobatga olinar edi).

Joriy yilda Farg‘ona viloyatida Nizomdagi yangi talablarga muvofiq 950 nafar fuqaro Haj ziyoratiga otlanish uchun ro‘yxatga olindi.

Men qirq yildan ziyod ta’lim sohasida mehnat qildim. To‘rt nafar farzandni tarbiyalab voyaga yetkazdim. Nabiralarim el koriga yarab qoldi. Baxtli farovon hayot kechiryapman. Yagona orzum — musulmonchilikning muhim amallaridan biri — Haj safarini ado etish edi.

Allohga shukrkim, Hajga har tomonlama munosib insonlar borishi lozimligi to‘g‘risidagi talablardan keyin, mening qalbimda ham bir uchqun paydo bo‘ldi. Mahallamizda bo‘lgan yig‘inda nomzodim ham tavsiya qilindi. Yurtimiz ijtimoiy hayotida faol ishtirokim, mahalladagi tadbirlarda doimiy qatnashib kelganligim e’tiborga olinib, Haj ziyoratiga borishim aytilganida, ko‘zlarimga yosh keldi.

Insonning ezgu amallari e’tirof etiladigan, bunday adolatli tizim joriy qilinganligi uchun Allohga shukrlar aytdim. Menga musulmonlarning ushbu ezgu amalini bajarish jarayonida mahallamizda istiqomat qilayotgan diniy ekstremistik oqimiga noto‘g‘ri kirib qolgan ojiza ayolning biriktirib berilgani zimmamdagi mas’uliyatni ikki karra oshirdi. Endi men bu fuqaroning ijtimoiy hayotga qaytishi, Vatanga daxldorlik hissini oshirishga bo‘lgan ishonchini uyg‘otishga, uni chinakam vatanparvar bo‘lib tarbiyalanishiga o‘z hissamni qo‘shaman.

Najibaxon Abdullayeva, marg‘ilonlik 74 yoshli onaxon