Тошкент шаҳар божхона бошқармаси томонидан тарихий аҳамиятга эга тангаларни почта жўнатмалари орқали Ўзбекистонга олиб киришга бўлган уринишлар фош қилинди, деб хабар беради божхона қўмитаси матбуот хизмати.
Тошкент шаҳар божхона бошқармасининг «Бош почтамт» ташқи иқтисодий фаолият божхона пости ходимлари Исроил давлатидан Самарқанд шаҳрида истиқомат қилувчи М. Бозоров номига юборилган почта жўнатмасини белгиланган тартибда божхона кўригидан ўтказганида, жўнатмадаги буюмлар орасида оғирлиги 58 граммдан ортиқ бўлган 9 дона турли тарихий тилла тангалар борлиги аниқланди.
«Маданият вазирлигининг бадиий экспертлари хулосасига кўра, ўтган асрнинг бошларида Чор Россияси ва Буюк Британияда зарб қилинган тангаларнинг қалбаки нусхалари эканлигини ҳамда асиллик даражаси 750 ва 900 бўлган ушбу тилла тангаларнинг умумий қиймати салкам 16 миллион 700 минг сўмни ташкил қилар экан», — дейилади хабарда.
Шунингдек, мазкур пост ходимлари Россиядан тошкентлик Константин Тримасов номига юборилган почта жўнатмасида ҳам божхона декларациясида кўрсатилмаган 108 дона турли йилларга мансуб тангалар борлигини аниқлади.
Экспертлар томонидан турли давлатларда зарб қилинган ушбу тангаларнинг 10 таси ўтган асрнинг ўрталарида зарб қилингани ва шу сабабли тарихий аҳамиятга эга эканлиги юзасидан хулоса қилинган.
Юқоридаги ҳар икки ҳолат бўйича ашёвий далил сифатида олинган тангалар Миробод тумани маъмурий ишлар бўйича суди қарорига асосан давлат эгалигига ўтказилди.
Изоҳ (0)