Toshkent aeroportida qo‘lga olingan yozuvchi Nurullo Otaxonov hibsdan ozod etildi

27-sentabr kuni Toshkent xalqaro aeroportda qo‘lga olingan yozuvchi Nurullo Otaxonov (Nurulloh Muhammad Raufxon) hibsdan ozod etildi. Bu haqda, “Kun.uz”ning yozishicha, uning o‘g‘li Fayzullaxon Otaxonov Nurullo Otaxonovning Facebook’dagi sahifasida ma’lum qilgan.

“Yashnobod tuman ichki ishlar bo‘limi boshlig‘i o‘zining xizmat mashinasida ‘Toshturma’dan chiqarib, eshigimiz tagiga qo‘yib ketgan”, — deyiladi Facebook’da Nurullo Otaxonovning o‘g‘li tomonidan qoldirilgan xabarda.

Avvalroq Toshkent shahar IIBB Nurullo Otaxonovga nisbatan qidiruv 11-may kuni e’lon qilingani, shu sababli u 27-sentabr kuni, Toshkent qo‘nishi bilan qo‘lga olingani haqida axborot bergan edi. Nurullo Otaxonov so‘nggi ikki yildan beri Turkiyada yashab kelayotgan edi.

Nurullo Otaxonovning qo‘lga olinishiga unga nisbatan sirtdan Jinoyat kodeksining 159-moddasi (“O‘zbekiston Respublikasining konstitutsiyaviy tuzumiga tajovuz qilish”) bo‘yicha jinoyat ishi qo‘zg‘atilgani, 159-moddaning 1-qismi, 244-1-moddaning 3-qismi “g” bandi bilan ayblov e’lon qilinib, qidiruvga berilgani sabab bo‘lgan.Nurullo Otaxonov Farg‘ona viloyati O‘zbekiston tumanidagi Oyimcha Qaqir qishlog‘ida tug‘ilgan. Toshkent Davlat universiteti (hozirgi O‘zMU)ning o‘zbek filologiyasi bo‘limini tamomlagan. “Yo‘l boshida”, “Dunyo keng”, “Shu yerlik kishi” kabi qissa va hikoyalar to‘plamlari e’lon qilingan. Uning sevgi mavzusidagi “Oq bino oqshomlari” hikoyasi “Sharq yulduzi” jurnalida chop etilgach, “Yilning eng yaxshi hikoyasi” deb topilgan.

Ushbu hikoya asosida “Oq bino oqshomlari” badiiy filmi suratga olingan. Yozuvchi turk, gruzin, xitoy va rus adabiyotidan bir qator asarlar tarjima qilgan. Yozuvchi keyingi 25 yil mobaynida “Yoshlik” (bo‘lim mudiri), “Mushtum” (mas’ul kotib), “Sharq yulduzi” (bo‘lim mudiri), “Hidoyat” (bosh muharrir) kabi turli jurnallarda hamda “Movarounnahr” nashriyotida (bosh direktor) ishlagan.