Тошкент аэропортида қўлга олинган ёзувчи Нурулло Отахонов ҳибсдан озод этилди

27 сентябрь куни Тошкент халқаро аэропортда қўлга олинган ёзувчи Нурулло Отахонов (Нуруллоҳ Муҳаммад Рауфхон) ҳибсдан озод этилди. Бу ҳақда, «Kun.uz»нинг ёзишича, унинг ўғли Файзуллахон Отахонов Нурулло Отахоновнинг Facebook’даги саҳифасида маълум қилган.

«Яшнобод туман ички ишлар бўлими бошлиғи ўзининг хизмат машинасида ‘Тоштурмаъдан чиқариб, эшигимиз тагига қўйиб кетган», — дейилади Facebook’да Нурулло Отахоновнинг ўғли томонидан қолдирилган хабарда.

Аввалроқ Тошкент шаҳар ИИББ Нурулло Отахоновга нисбатан қидирув 11 май куни эълон қилингани, шу сабабли у 27 сентябрь куни, Тошкент қўниши билан қўлга олингани ҳақида ахборот берган эди. Нурулло Отахонов сўнгги икки йилдан бери Туркияда яшаб келаётган эди.

Нурулло Отахоновнинг қўлга олинишига унга нисбатан сиртдан Жиноят кодексининг 159-моддаси («Ўзбекистон Республикасининг конституциявий тузумига тажовуз қилиш») бўйича жиноят иши қўзғатилгани, 159-модданинг 1-қисми, 244-1-модданинг 3-қисми «г» банди билан айблов эълон қилиниб, қидирувга берилгани сабаб бўлган.Нурулло Отахонов Фарғона вилояти Ўзбекистон туманидаги Ойимча Қақир қишлоғида туғилган. Тошкент Давлат университети (ҳозирги ЎзМУ)нинг ўзбек филологияси бўлимини тамомлаган. «Йўл бошида», «Дунё кенг», «Шу ерлик киши» каби қисса ва ҳикоялар тўпламлари эълон қилинган. Унинг севги мавзусидаги «Оқ бино оқшомлари» ҳикояси «Шарқ юлдузи» журналида чоп этилгач, «Йилнинг энг яхши ҳикояси» деб топилган.

Ушбу ҳикоя асосида «Оқ бино оқшомлари» бадиий фильми суратга олинган. Ёзувчи турк, грузин, хитой ва рус адабиётидан бир қатор асарлар таржима қилган. Ёзувчи кейинги 25 йил мобайнида «Ёшлик» (бўлим мудири), «Муштум» (масъул котиб), «Шарқ юлдузи» (бўлим мудири), «Ҳидоят» (бош муҳаррир) каби турли журналларда ҳамда «Мовароуннаҳр» нашриётида (бош директор) ишлаган.